Fitorja 3-0 e Irlandës ndaj Izraelit në Debrecen të Hungarisë është shoqëruar me tensione edhe pas përfundimit të ndeshjes, e cila u zhvillua në një atmosferë të pazakontë për shkak të qëndrimeve të shprehura nga pala irlandeze lidhur me luftën në Gaza.
Para ndeshjes, futbollistët irlandezë nuk shkëmbyen shtrëngime duarsh me kundërshtarët e tyre, ndërsa gjatë himnit izraelit qëndruan me kokën ulur. Lojtarët irlandezë gjithashtu mbanin shirita të zinj në krahë.
Pas përfundimit të takimit, sipas raportimeve të publikuara në mediat britanike, pati një debat mes mbrojtësit irlandez Jake O’Brien dhe kapitenit të Izraelit, Manor Solomon.
O’Brien dyshohet se iu drejtua Solomonit duke i thënë: Turp të kesh për atë që po bëni në Gaza. E meritoni të humbni. Sipas të njëjtave raportime, Solomon iu përgjigj: Dil këtu, bëhu burrë. Mos fol pas murit.
Kapiteni izraelit foli më pas publikisht për atmosferën gjatë ndeshjes dhe për sjelljen e futbollistëve irlandezë. Solomon tha se nuk dëshironte të komentonte gjithçka që mendonte për ta, pasi mund të përballej me pezullim.
“Sigurisht që ata na urrejnë dhe ne nuk i pëlqejmë ata. Mezi e pres ndeshjen e radhës kundër tyre. Do të jetë krejtësisht ndryshe”, deklaroi Solomon.
I pyetur edhe për momentin kur futbollistët irlandezë qëndruan me kokën ulur gjatë himnit izraelit, Solomon tha se nuk ishte i interesuar për veprimin e tyre dhe u shpreh me tone të forta për vendin e tij.
“Ne jemi krenarë që veshim fanellën e Kombëtares dhe jemi izraelitë. Jemi krenarë për vendin dhe ushtarët tanë”, deklaroi ai.
Irlanda e fitoi ndeshjen 3-0, me të tre golat të shënuar në pjesën e parë nga Troy Parrott, Adam Idah dhe Jack Moylan.
Takimi ishte shoqëruar prej ditësh me polemika për shkak të luftës në Gaza. Irlanda kishte ardhur nën presion për të bojkotuar ndeshjet ndaj Izraelit, ndërsa Federata Irlandeze e Futbollit kishte kërkuar më herët që Izraeli të pezullohej nga garat e UEFA-s.
Izraeli dhe Irlanda do të përballen sërish të dielën e ardhshme në Backa Topola të Serbisë, në një tjetër ndeshje të zhvilluar në terren neutral. Ndërkohë, Kosova do të përballet me Izraelin të enjten në Debrecen.
