Lautaro Martinez ishte i gatshëm të transferohej te Barcelona gjatë merkatos së verës, nëse klubi katalanas do të arrinte një marrëveshje me Interin për transferimin e tij.
Sipas “Diario SPORT”, Barcelona e shqyrtoi seriozisht mundësinë e afruarjes së sulmuesit argjentinas gjatë muajit gusht, pasi drejtuesit katalanas morën sinjale se 28-vjeçari ishte i hapur për një aventurë të re në La Liga.
Megjithatë, Lautaro nuk dëshironte të prishte marrëdhëniet me Interin, klubin ku është shndërruar në një prej figurave kryesore. Për këtë arsye, argjentinasi ishte i gatshëm të largohej vetëm nëse Barcelona dhe Interi do të gjenin një marrëveshje që do të ishte e pranueshme për të gjitha palët.
Interesimi i Barcelonës për Lautaron nuk është i ri. Emri i sulmuesit kishte qenë në planet e klubit edhe në vitin 2021, kur ish-sekretari teknik Ramon Planes kishte nisur kontaktet me të. Në atë periudhë, megjithatë, problemet financiare të Barcelonës e bënë të pamundur realizimin e transferimit.
Këtë verë, emri i Lautaro Martinez u rikthye fuqishëm në listën e Barcelonës pasi klubi kuptoi se Atletico Madridi nuk kishte ndërmend të shiste Julian Alvarez. Argjentinasi u konsiderua një alternativë e rëndësishme nga drejtuesit sportivë të Barcelonës dhe trajneri Hansi Flick, edhe pse Alvarez mbeti objektivi kryesor deri në fund të merkatos.
Drejtori sportiv Deco kontaktoi përfaqësuesit e Lautaros, ndërsa presidenti i Barcelonës, Joan Laporta, zhvilloi bisedime direkte me presidentin e Interit, Giuseppe Marotta.
Por për Interin situata ishte e qartë, Martinez konsiderohej i pazëvendësueshëm dhe klubi italian nuk kishte interes ta shiste në një fazë kaq të avancuar të merkatos.
Barcelona kishte mbajtur të hapur mundësinë e transferimit përmes një shitjeje të mundshme, e cila do t’i krijonte hapësirën financiare për të bërë një tjetër lëvizje në merkato. Në fund, një skenar i tillë nuk u realizua.
Klubi katalanas zgjodhi të transferonte Gabriel Jesus, duke i dhënë fund kërkimit për një tjetër numër 9. Më pas, Raphinha u aktivizua në këtë rol, ndërsa Lautaro Martinez mbeti një objektiv i parealizuar i Barcelonës.
