Presidenti i Shteteve të Bashkuara, Donald Trump, ka bërë deklarata të forta për Iranin dhe situatën në Ngushticën e Hormuzit, gjatë një fjalimi të mbajtur sot përpara forcave të zbatimit të ligjit.
Duke folur për tensionet në Lindjen e Mesme, Trump deklaroi se Irani po pëson një humbje të rëndë, ndërsa paralajmëroi një lëvizje të fortë gjeopolitike lidhur me Ngushticën e Hormuzit, një nga korridoret detare më të rëndësishme në botë për transportin e naftës.
“Pasi të përfundojmë mposhtjen e Iranit, i cili po mposhtet shumë keq, shumë shpejt do të deklaroj Ngushticën e Hormuzit një territor të Shteteve të Bashkuara”, deklaroi Trump.
Presidenti amerikan pretendoi gjithashtu se SHBA-ja ka kontrollin ushtarak detar në këtë zonë strategjike.
“Kjo është në thelb ajo që është. Ne kemi bllokadën. Asnjë anije nuk kalon përveçse nëse ne duam”, u shpreh ai.
Gjatë të njëjtit fjalim, Trump u ndal edhe te situata e sigurisë brenda Shteteve të Bashkuara, duke prezantuar shifra që, sipas tij, tregojnë një rënie historike të kriminalitetit gjatë mandatit të tij.
Trump deklaroi se masat e ndërmarra nga administrata amerikane kanë sjellë rezultate konkrete në sigurinë publike.
“Vitin e kaluar, pati mbi 3,100 vrasje më pak se viti para se të merrja detyrën, 10,000 përdhunime më pak dhe 1.1 milion më pak krime me dhunë. Grabitjet ranë me 19%, vjedhjet e makinave pësuan rënie drastike prej 23%”, tha Trump.
Sipas presidentit amerikan, kjo tendencë ka vijuar edhe gjatë vitit 2026, me grabitjet që, sipas tij, kanë rënë me 20% të tjera dhe vrasjet me 23%.
