Kryeministri izraelit Benjamin Netanyahu ka shkaktuar reagime pas një deklarate provokuese për Britaninë e Madhe, të bërë gjatë një interviste të gjatë me radion izraelite Galey Israel.
Duke folur për ndryshimet politike dhe shoqërore në Europë dhe për qëndrimet gjithnjë e më kritike ndaj Izraelit, Netanyahu iu referua Britanisë me shprehjen “Republika Islamike e Britanisë”.
Komenti erdhi teksa ai kujtonte qëndrimin pozitiv ndaj Izraelit të anëtarëve të familjes Churchill gjatë Luftës Gjashtëditore. Netanyahu tha se një qëndrim të tillë sot do të ishte e vështirë ta gjeje në Britani, “që mund ta quash Republika Islamike e Britanisë”.
Kur intervistuesi e pyeti nëse e njëjta gjë mund të thuhej edhe për pjesën tjetër të Europës, Netanyahu u përgjigj pozitivisht, duke e lidhur komentin me peshën në rritje të komuniteteve myslimane dhe ndryshimin e qëndrimeve europiane ndaj Izraelit.
Kryeministri izraelit më pas bëri edhe një tjetër koment sarkastik, duke thënë se “republika e parë islamike me armë bërthamore do të jetë Republika Islamike e Britanisë”, përpara se të shtonte se Izraeli po punon që të mos ketë “një tjetër” të tillë në Iran.
Deklarata vjen në një moment marrëdhëniesh të tensionuara mes Izraelit dhe Britanisë, pasi Londra ka ashpërsuar kritikat ndaj politikave izraelite në Gaza dhe ka njohur shtetin palestinez.
Komenti i Netanyahut është interpretuar gjerësisht si një goditje ndaj ndryshimeve demografike dhe politike në Britani, por edhe si pjesë e përplasjes më të gjerë të qeverisë së tij me disa prej qeverive europiane që janë bërë më kritike ndaj Izraelit.
