Los Angeles Lakers po vendosin një tjetër rekord, këtë herë jo në parket.
Një marrëveshje për blerjen e klubit të famshëm të NBA-së e vlerëson ekipin në 12.5 miliardë dollarë, një shifër rekord që tregon sa shpejt po rritet vlera e skuadrave sportive amerikane.
Blerësit janë sipërmarrësi Joshua Kushner dhe ish-drejtuesi i Disney, Bob Iger. Marrëveshja duhet ende të marrë miratimin e Bordit të Guvernatorëve të NBA-së.
Shifra bëhet edhe më e jashtëzakonshme kur krahasohet me të kaluarën e afërt. Vetëm rreth 14 muaj më parë, Lakers ishin vlerësuar rreth 10 miliardë dollarë.
Pra, brenda pak më shumë se një viti, vlerësimi është rritur me rreth 25%.
Por Lakers janë vetëm shembulli më i fundit i një fenomeni shumë më të madh.
Të drejtat televizive dhe streaming për sportet amerikane arritën rreth 29.5 miliardë dollarë në vitin 2025 dhe parashikohet të shkojnë drejt 37 miliardë dollarëve deri në vitin 2030.
Arsyeja është relativisht e thjeshtë: ndërsa publiku i televizionit tradicional është fragmentuar mes platformave të ndryshme, sporti mbetet një nga produktet e pakta që miliona njerëz vazhdojnë ta shohin drejtpërdrejt.
Në të njëjtën kohë, numri i skuadrave është i kufizuar, ndërsa miliarderët dhe fondet që duan t’i blejnë po shtohen. Kjo po i shtyn çmimet gjithnjë e më lart.
Reuters e përshkruan marrëveshjen e Lakers si pjesë të një “ethet ari” në sport, ku skuadrat profesioniste po shndërrohen në disa prej aseteve më të kërkuara në botë.
