Presidenti i Shteteve të Bashkuara, Donald Trump, deklaroi se SHBA-të do të ndërmarrin një sulm ndaj objektit nëntokësor bërthamor të njohur si “Mali Kazmë” në Iran, duke thënë se goditja do të ndodhë “shumë shpejt”.
Trump tha se objektivi ndodhet pranë kompleksit bërthamor të Natanzit, në Iranin qendror, dhe se SHBA-të janë të fokusuara te kontrolli i materialeve bërthamore të Iranit.
I pyetur nëse beson se Teherani ka zhvendosur centrifuga të avancuara bërthamore në këtë strukturë të fortifikuar nëntokësore, presidenti amerikan u përgjigj se një gjë e tillë “nuk është e regjistruar” nga autoritetet amerikane.
“Nuk ka rëndësi nëse nuk kanë materialin. Ne ndjekim materialin, aty është çështja kryesore”, tha Trump, duke shtuar se SHBA-të do ta godasin zonën “shumë shpejt dhe shumë rëndë”.
Sipas presidentit amerikan, ai zakonisht nuk do të bënte publik një informacion të tillë, por deklaroi se nuk beson se Irani mund të ndërmarrë masa kundër këtij veprimi.
Kjo nuk është hera e parë që Trump përmend një sulm ndaj këtij objekti. Javën e kaluar ai tha se SHBA-të “ndoshta do ta provojnë Pickaxe-n relativisht shpejt”.
Ndërkohë, sipas raportimeve të CNN, Izraeli beson se Irani mund të ketë zhvendosur centrifuga të avancuara dhe një pjesë të rezervave të uraniumit të pasuruar në këtë objekt pas konfliktit 12-ditor të qershorit, duke cituar një burim izraelit të njohur me çështjen.
Objekti “Mali Kazmë” iu deklarua Agjencisë Ndërkombëtare të Energjisë Atomike në vitin 2020 si një strukturë e planifikuar për montimin e centrifugave që përdoren në procesin e pasurimit të uraniumit.
