Në kulmin e sezonit turistik dhe kur degradimi i rrugës ka arritur nivele alarmante, qeveria është kujtuar më në fund të hedhë sytë drejt autostradës Tiranë–Durrës.
Me një fond prej 77 milionë lekësh (rreth 770 mijë euro), Autoriteti Rrugor Shqiptar synon të nënshkruajë një kontratë që lidhet me përmirësimin e shtresave asfaltike të segmentit Vorë–Ura e Dajlanit.
Në dokumentacionin që shoqëron procedurën me objekt: "Emergjencë për riparimin e nënshtresave dhe shtresave asfaltike të segmentit rrugor Vorë–Ura e Dajlanit", theksohet se ky aks është shumë i rëndësishëm pasi bën pjesë në korridorin ekzistues veri–jug dhe shërben si lidhje kyçe mes Portit të Durrësit dhe kryeqytetit Tiranë, si dhe më gjerë.
"Aktualisht, në të dy anët e këtij segmenti rrugor ka dëmtime të konsiderueshme, si rrjetëzime, gropëzime dhe dëmtime që arrijnë deri në nënshtresa në disa zona specifike. Segmenti në fjalë ka një gjatësi rreth 20 km, me dy karrexhata të ndara nga trafikndarës të tipit ‘New Jersey’. Rruga përballon një trafik shumë të rënduar, ku pjesën më të madhe e zë trafiku i mjeteve të rënda.
Shtresa e asfaltobetonit dhe ajo e binderit është e konsumuar dhe e rrjetëzuar në rreth 25% të sipërfaqes (korsia e trafikut të rëndë), me gjerësi 3.5 metra – 10% në drejtimin Vorë–Mbikalimi i Dajlanit dhe 15% në drejtimin Mbikalimi i Dajlanit–Vorë. Ndërkohë, shtresa e konglomeratit bituminoz është e dëmtuar në rreth 30% të sipërfaqes ku do të ndërhyhet me asfaltobeton dhe binder.
Zonat ku do të kryhet ndërhyrje me stabilizant 15 cm dhe konglomerat 12 cm janë ato ku paketa e konglomeratëve bituminozë është totalisht e dëmtuar dhe balta – e përbërë nga pluhura sipërfaqësore dhe papastërti të sjella nga mjetet e rënda në prani të reshjeve – ka dalë në sipërfaqe. Këto zona janë tipike në drejtimin Vorë–Ura e Dajlanit (Pika 0 në dalje të mbikalimit të Vorës, Karburanti Elda, hyrje-daljet e Gjirit të Lalzit, Bistro – restoranti mbi superstradë, Sukth, Mbikalimi i Shkozetit, Karburanti Kastrati – dalje Durrës)", thuhet në dokument.
ARRSH thekson se në pesë deri në gjashtë raste janë dëmtuar edhe korsi të shpejtësisë (binder dhe tapet). Ndërsa në drejtimin Ura e Dajlanit–Vorë, dëmtimet shtrihen në sipërfaqe më të mëdha, kryesisht në korsinë e mjeteve të rënda, por në 15 deri në 20 raste janë dëmtuar edhe korsitë e shpejtësisë, si p.sh.: Mbikalimi i Shkozetit, Sukth, Bistro, hyrje-dalje nga kantieret e ndërtimit (në tre raste), hyrje-dalje Maminas.
"Zonat ku do të bëhet riparimi i shtresës binder dhe tapet janë zona ndërmjetëse, ku ka rrjetëzime, çedime dhe rjepëzime të vogla, por pa dalje balte në sipërfaqe. Paraprakisht, theksohet se paketa e shtresave do të ruhet si ajo ekzistuese: 4 cm asfaltobeton, 6 cm binder dhe 12 cm konglomerat bituminoz. Ndërhyrja parashikon skarifikimin e të gjithë shtresës së tapetit, binderit dhe konglomeratit të dëmtuar", përfundon dokumenti./Monitor/
