Një situatë alarmante po zhvillohet në Parkun Kombëtar “Lurë – Mali i Dejës”, ku prej ditësh zjarret kanë përfshirë sipërfaqe të konsiderueshme të parkut, ndërsa institucionet shtetërore mbeten në heshtje.
Aktivistët mjedisorë Dhimitër Koleci dhe Adem Gjokola, në një protestë të organizuar nga banorët e fshatit Lufaj kundër ndërtimit të një hidrocentrali të ri, ngritën alarmin për gjendjen dramatike që po përjeton zona e mbrojtur.
Sipas tyre, zjarri është përhapur me shpejtësi në mungesë të burimeve natyrore ujore, të cilat janë devijuar drejt hidrocentraleve. “Futja e ujit në tuba e ka shkretuar zonën,” – deklaroi Koleci, duke theksuar se rrjedhat natyrore, që dikur ndalonin përhapjen e flakëve, tashmë janë tharë nga projektet energjetike.
Banorët lokalë kanë luftuar me mjetet e tyre modeste dhe ndihmën e ushtrisë për katër ditë dhe netë me radhë për të shpëtuar stanet, bagëtinë dhe bletët nga shkrumbimi. Por, mungesa e pajisjeve dhe përgatitjes profesionale ka vënë në pah një dështim të rëndë institucional.
“Ata që duhej të ishin në krye të detyrës – Bashkia Mat, qeveria qëndrore, Agjencia Kombëtare e Zonave të Mbrojtura – rrinë duarkryq, ndërsa vendimet e tyre kanë sjellë këtë katastrofë,” – u shprehën aktivistët në fund të protestës.
Dërgimi i forcave të ushtrisë, të papajisura dhe të patrajnuara për situata zjarri, tregon, sipas tyre, mungesën e vullnetit politik për të mbrojtur një nga pasuritë më të rëndësishme natyrore të Shqipërisë. Aktivistët dhe banorët kërkojnë ndërhyrje urgjente dhe ndalimin e projekteve që po shkatërrojnë peizazhin dhe biodiversitetin e Lurës.
