Një aktivitet i përfshirë në librat shkollorë për fëmijë ka shkaktuar skandal në Kosovë. Aktiviteti kërkon nga nxënësit që ata të “luajnë” rolin e “të verbrit” dhe “shoqëruesit të të verbrit”, duke zhvilluar veprime që kanë shkaktuar reagime të fuqishme nga prindërit dhe pjesë të shoqërisë. Ky aktivitet është konsideruar nga shumë si një ndërhyrje e papërshtatshme dhe një tentativë për të imponuar konceptet e seksualitetit dhe marrëdhënieve intime në një moshë të paformuar.
Libri shkollor që përmban këtë aktivitet thotë:
“Nxënësit duhet të gjejnë një partner me të cilin nuk janë shumë të afërt. Në secilin çift, njëri duhet të veprojë si i verbër dhe tjetri si shoqërues i tij. Shoqëruesi mund të bëjë me të verbërin çfarë të dojë për 5 minuta, dhe më pas të shkëmbejnë rolet. Pas 5 minutash, nxënësit do të diskutojnë dhe tregojnë sesi janë ndier në të dy rolet.”
Ky aktivitet ka ngritur pikëpyetje të shumta mbi qasjen edukative të sistemit arsimor, me shumë prindër dhe edukatorë që argumentojnë se është një përpjekje për të imponuar normat kulturore dhe seksuale europiane, të cilat mund të mos jenë të përshtatshme për shoqërinë kosovare. Kritikët e shohin këtë si një tentativë për të ndikuar në zhvillimin seksual të fëmijëve përmes një aktiviteti të padrejtë dhe të papërshtatshëm.
Një pjesë e madhe e popullsisë e ka konsideruar këtë si një “perversitet” që nuk ka asnjë lidhje me mësimin dhe edukimin shkollor, dhe ka kërkuar tërheqjen e librit dhe përmbajtjes së tij nga shkollat.
