SPAK në bashkëpunim me autoritetet franceze goditi një grup kriminal të trafikut të drogës dhe dërgoi në pranga 19 persona, tre prej të cilëve në Shqipëri.
Sipas Prokurorisë së Posacme, grupi kriminal drejtohej nga Redian Doda, jetonte në Shqipëri dhe e drejtonte trafikun në distancë. Redian Doda dhe dy persona të tjerë, Zabit Fisniku e Fabi Isaku u arrestuan në vendin tonë, ndërsa u ushtrua kontroll në 10 banesa e biznese. SPAK deklaroi se lënda narkotikë e sekuestruar kap vlerën e mbi 1 milion euro.
Hetimi në Shqipëri nisi në 2023 për trafik droge e grup kriminal dhe më pas u ngritën grupe të përbashkëta hetimore me autoritetet franceze.
Hetimet në Francë
Nga hetimet rezultoi se gjatë periudhës gusht-dhjetor 2022, autoritetet franceze të drejtësisë kanë filluar një hetim paraprak në qarkun e Albertville (73), në lidhje me veprimet e një grupi kriminal të organizuar i cili është marrë me trafikun e drogës. Kjo strukturë ishte e vendosur në qarkun e Lionit dhe furnizonte grupet e shitjes të vendosura në qarkun e Savojës (73) dhe Savojës së sipërme (74). Juridiksioni ndërkrahinor i posaçëm i Lionit ka marrë përsipër dosjen dhe ka hapur një hetim gjyqësor, drejtimi i të cilit i është besuar Seksionit të Kërkimeve të Lionit.
Hetimet e kryera, bënë të mundur të vërtetohen dërgesat me lëndë narkotike pothuajse ditore tek grupet e shitjes në qarqet e Rhone (69), Ain (01), Savojë (73) dhe Savojës së sipërme (74) nga një nënshtetas shqiptar që jetonte në periferi të Lionit (69).
Aktivitet i paligjshëm kriminal në fushën e narkotikëve që zhvillohej në territorin francez, drejtohej nga një shtetas shqiptar i cili jetonte dhe banonte në Shqipëri.
Hetimet në Shqipëri
Nga hetimet e përbashkëta të kryera nga prokuroritë e dy vendeve janë identifikuar 19 persona (shtetas shqiptarë dhe të huaj), të cilët ishin të përfshirë në aktivitetin e paligjshëm të trafikut të narkotikëve.
Autoritetet franceze të drejtësisë kanë proceduar me arrestimin e 16 shtetasve shqiptarë dhe të huaj, sekuestrimin e sasisë monetare prej 20.000 euro dhe të 3 automjeteve.
Në Shqipëri, Gjykata e Posacme me kërkesë të SPAK ka caktuar masën e sigurisë “arrest me burg” për shtetasit Redian Doda, Zabit Fisniku, Fabi Isaku, të cilët janë vënë më pas në pranga, ku në aksion morën pjesë dhe oficerët e Xhandarmërisë Franceze (pjesë e Skuadrës së Përbashkët Hetimore).
Ndërsa janë ushtruar 10 kontrolle në banesa, biznese, automjete apo edhe persona të ndryshëm.
Vlera e lëndëve narkotike të sekuestruara tejkalon, sipas SPAK, vlerën prej 1 milion euro.
Goditet grupi kriminal, trafikoi drogë me vlerë 1 mln euro, kreu jetonte në Shqipëri, e dirigjonte aktivitetin në distancë
