Gjykata e Tiranës dënoi me 5 vite burgim Nikollë Sherrnikun për krijim të kushteve për të kryer vrasje. Për shkak të gjykimit të shkurtuar Sherrniku do të vuajë 3 vite e 4 muaj burg. Ai është personi që vodhi në Gjermani targat e automjetit që u përdor në masakrën e Don Boskos, ku u qëllua mbi lokalin e vëllezërve Murati ku për pasojë mbeti e vrarë banakierja Mimoza Paja. Nikollë Sherrniku njihej si njeri i besuar i Ervis Martinaj, bosi i kumarit i zhdukur pa gjurmë. Martinaj ishte në perplasje me Fatjon Muratin pasi ai ishte i dyshuar për masakrën te mbikalimi i Fushë Krujës ku u ekzekutua Brilant Martinaj dhe dy miqtë e tij Dikler Vata e Besmir Hoxha.
