Banorë, intelektualë, përfaqësues të Bashkisë së Selenicës dhe të njësive administrative të zonës u mblodhën në qendër të qytetit në kuadër të Kuvendit të Selenicës, ku diskutuan kundërshtimin ndaj reformës së re territoriale që parashikon shkrirjen e bashkisë.
Gjatë takimit, pjesëmarrësit paraqitën argumentet e tyre kundër ndryshimeve të propozuara dhe diskutuan hapat që do të ndërmarrin për të mbrojtur statusin e Selenicës si njësi e pavarur e qeverisjes vendore.
Në fjalën e tyre, banorët dhe intelektualët kërkuan tërheqjen e projektit të reformës, duke argumentuar se bashkimi i Selenicës me Bashkinë e Vlorës do të vështirësonte aksesin e qytetarëve në shërbimet publike dhe do të rriste distancën mes institucioneve dhe komunitetit.
Sipas tyre, një riorganizim i tillë do të rrezikonte ta linte Selenicën jashtë vëmendjes institucionale, duke sjellë ulje të investimeve dhe ngadalësim të zhvillimit të zonës.
Pjesëmarrësit theksuan se ruajtja e statusit aktual të Bashkisë së Selenicës është thelbësore për zhvillimin ekonomik dhe social të zonës, si edhe për garantimin e ofrimit të shërbimeve publike sa më pranë qytetarëve.
