VNA ka mësuar arsyen e debatit mes anëtares së Këshillit Kombëtar, Ilirjana Kuçana, dhe kryetarit të Partisë Demokratike, Sali Berisha, gjatë mbledhjes së kësaj të mërkure të Këshillit Kombëtar.
Burime bëjnë me dije se shkak u bë një rezolutë e paraqitur nga Ilirjana Kuçana dhe një tjetër anëtar i Këshillit Kombëtar, Lisandër Hoxha, e cila kishte në fokus Sekretarin e Përgjithshëm të PD-së, Flamur Noka. Përmes saj synohej të bllokohej kandidimi i Nokës për një tjetër mandat në postin e numrit dy të Partisë Demokratike.
Pas ndërprerjes së transmetimit live, debati ka vijuar me tone të ashpra. Sipas burimeve të VNA-së, Kuçana dhe Hoxha i janë drejtuar Berishës me fjalët: “Ne nuk jemi kartona, ti ke vendosur për Mulin.”
Pavarësisht përplasjes, Sali Berisha ka vendosur ta lërë garën të hapur për postin e Sekretarit të Përgjithshëm, ku Flamur Noka do të përballet me Saimir Korreshin. Megjithatë, sipas burimeve, Noka mbetet favoriti për ta fituar edhe këtë mandat.
