Kukësi është përfshirë nga reshje të dendura dëbore, ku në zonat malore si Shishtaveci, trashësia e dëborës ka arritur deri në 50 cm. Si pasojë, dhjetëra fshatra kanë mbetur pa energji elektrike dhe janë regjistruar rënie gurësh në disa akse rrugore, duke krijuar vështirësi për qarkullimin.
Të gjithë territori i Qarkut Kukës është përfshirë nga reshje shiu me intensitet të ulët dhe reshje bore në lartësinë mbi 450 metra. Këto kushte të motit kanë bërë që akset nacionale të jenë nën trysninë e rënies së gurëve, inerteve dhe ngricave, duke krijuar pengesa në qarkullimin e mjeteve në disa segmente rrugore.
Subjektet kontraktore kanë punuar pa ndërprerje me kapacitetet e plota për mbajtjen funksionale të akseve rrugore, dhe aktualisht të gjitha akset janë të qarkullueshme pa probleme të mëdha. Bashkitë Kukës, Tropojë dhe Has nuk kanë raportuar ndonjë problematikë emergjente, megjithatë, disa fshatra si Zogaj, Kepeneg, Grykë-Çajë, Gdheshtë, Pistë dhe njësitë administrative Bytyq, Golaj, Bushtricë dhe Malzi kanë hasur vështirësi në furnizimin me energji elektrike.
Po ashtu, Bulqiza është përfshirë nga reshje bore gjatë gjithë natës, duke shkaktuar bllokimin e akseve rrugore dhe probleme me furnizimin me energji elektrike. Emergjencat civile kanë dalë në terren që në orët e para të mëngjesit dhe kanë bërë të mundur zhbllokimin e rrugëve.
Në akset nacionale Bulqizë-Tiranë-Peshkopi, kalimi është i mundur pa përdorimin e zinxhirëve, po ashtu edhe në rrugët rurale që lidhin njësitë administrative të bashkisë Bulqizë.
