Nga Desada Metaj
Incidenti i mbrëmshëm mes reporteres së Euronews Albania dhe drejtuesve të PD nuk është problemi më i madh që ka sot opozita. Për sa kohë nuk shohin problemin e vërtetë, por shfryjnë tek gazetarët, nuk kanë gjë në terezi as sot, as mot. Nga ana tjetër, përballimi i terrenit në kushtet kur një forcë politike humb zgjedhjet është i vështirë. Njëjtë ka qenë dhe kur PS ishte ngujuar në çadra poshtë zyrave të Sali Berishës, asokohe kryeministër.
Gazetarët e terrenit e bëjnë me pasion punën e tyre, por ndoshta presioni nga redaksitë për të raportuar në çdo moment live, për të mbushur hapësirën bosh televizive, i bën të tolloviten mes një grupi njerëzish të tensionuar që shfryjnë tek ata në mënyrën më të gabuar të mundshme.
Mos do të ishte më mirë që reporterët të flisnin pa kamera me protestuesit dhe më tej të raportonin ata vetë këndvështrimin e tyre për atë që po ndodh? Gazetarët nuk janë njerëz sterilë që duhet të përsërisin atë që thonë liderët e partive; ata duhet të kenë mendim dhe ta ndajnë me publikun përshtypjen dhe opinionin e tyre. Shumë nga gazetarët e terrenit që njoh kanë informacion më të tepërt se drejtuesit politikë të PS apo PD. Por reporterët nuk i fton njeri në studio të flasin për të vërtetat që ata i mësojnë duke takuar ballë për ballë qytetarët dhe drejtuesit e niveleve të dyta dhe të treta të partive. Në studiot televizive kapardisen opinionistë, në shumicë të paguar nga partitë politike, që flasin sipas listës së pagesës, duke orientuar qëllimisht publikun drejt të pavërtetës.
Shumë pak, apo aspak, gazetarë terreni u ftuan gjatë kësaj fushate të thonë mendimin e tyre mbi atë që ata prekin çdo ditë – takimet me militantë, mbështetës apo situatën brenda selive të partive. Kapardisja e opinionistëve që e nisin ditën në kafe, e vazhdojnë në restorante dhe e përfundojnë në studiot televizive ishte perceptimi për fushatën që merrte një pjesë e publikut nga TV.
Dhe e gjithë kjo nuk ndodh rastësisht apo spontanisht. Janë kryetarët e partive dhe interesat e televizioneve, një qark i mbyllur që bashkëpunon ngushtësisht i prirur për të shfaqur ato që kanë planifikuar dhe jo të vërtetën. Sa më shumë hapësirë të kenë gazetarët e terrenit për të thënë mendimet dhe opinionet e tyre, aq më të qartë do ta ketë publiku të vërtetën. Dhe për këtë mjafton që çdo reporteri që ndjek prej kohësh politikën, veç mikrofonit për të raportuar live, t’i jepet dhe mundësia të flasë për atë që sheh dhe percepton. Ju siguroj që dinë më shumë dhe janë më të saktë se gjithologët e studiove dhe arrogantët e politikës.
