Kryeministri Edi Rama është pritur me protesta në hyrje të Shkodrës, në kuadër të vizitës së tij për takimin me strukturat e Partisë Socialiste me rastin e 35-vjetorit të themelimit të saj.
Protestues të shoqërisë civile, të pajisur me pankarta të ngjashme me ato të përdorura në tubimin e zhvilluar më herët në kryeqytet, janë zhvendosur pranë zonës së Kalasë së Rozafës, aty ku pritet të zhvillohet takimi i kryeministrit me socialistët e Shkodrës.
Tubimi është zhvilluar në mënyrë paqësore dhe në prani të forcave të policisë.
Kjo shënon ditën e tretë të protestave në qytetin verior, ku pjesëmarrësit fillimisht janë mbledhur në qendër të Shkodrës dhe më pas para bashkisë, përpara se të zhvendoseshin sot në zonën pranë Kalasë së Rozafës.
Më herët, avokatja Sabina Meta u ka bërë thirrje qytetarëve përmes rrjeteve sociale që t’i bashkohen tubimit paqësor, duke theksuar se protesta nuk ka karakter politik dhe duhet të zhvillohet pa provokime. Sipas saj, tubimi do të zhvillohet në zonën pranë ish-karburantit përballë Kalasë së Rozafës, pa bllokim të rrugëve apo qarkullimit.
Autoritetet kanë bërë të ditur se protesta po monitorohet nga policia dhe deri më tani nuk janë raportuar incidente.
