Irani ka reaguar ndaj deklaratave të kryeministrit Edi Rama, i cili akuzoi Teheranin për përfshirje në një fushatë dezinformimi lidhur me debatin mbi projektin në Zvërnec.
Zëdhënësi i Ministrisë së Jashtme iraniane, Esmail Baghaei, i hodhi poshtë këto pretendime, duke i cilësuar ato të pabazuara dhe duke përdorur një ton ironik në reagimin e tij. “Irani? Ndoshta do të thonë se edhe flamingot ishin agjentë sekretë iranianë”, u shpreh ai.
Baghaei e konsideroi qëndrimin e qeverisë shqiptare si pjesë të një narrative të përsëritur, të cilën e lidhi me atë që ai e quajti përpjekje për të forcuar afrimin me Izraelin. Sipas tij, akuza të tilla shërbejnë për të shmangur debatin e brendshëm politik në Shqipëri dhe për të evituar llogaridhënien për çështje të brendshme.
Reagimi i Teheranit vjen pasi kryeministri Edi Rama, gjatë Samitit BE–Ballkani Perëndimor të zhvilluar në Mal të Zi, deklaroi se pas disa narrativave të përhapura në rrjetet sociale lidhur me projektin në Zvërnec qëndrojnë aktorë të huaj, duke përmendur në mënyrë të drejtpërdrejtë Iranin.
Deklaratat kanë rikthyer në vëmendje tensionet diplomatike mes dy vendeve, të cilat u përshkallëzuan pas vendimit të Shqipërisë për të ndërprerë marrëdhëniet diplomatike me Iranin në vitin 2022, pas akuzave për sulme kibernetike ndaj infrastrukturës shtetërore shqiptare.
