Në inagurimin e sotëm të Teatrit të Kukullave, ngjarja nuk pati asgjë të re krahasuar me shfaqjet e zakonshme të Edi Ramës. Ajo që ra më shumë në sy ishte mungesa e Erion Veliajt, kryebashkiakut të Tiranës, i cili ka qenë shpesh i pranishëm në ngjarjet publike të qeverisë. Ky distancim i Veliajt ngjall pikëpyetje, sidomos në një kohë kur përflitet për një arrestim të mundshëm të kryebashkiakut.
Mungesa e tij mund të ketë lidhje me hetimet që po zhvillohen nga SPAK. Veliaj është nën hetim për disa dosje korrupsioni, ndërsa së fundmi është vënë në fokus edhe pasuria e tij. Agjentët e Byrosë Kombëtare të Hetimit kanë kontrolluar banesën e Veliajt dhe zyrën e bashkëshortes së tij, Ajola Xoxa, duke sekuestruar celularin e saj. Kjo ka shtuar më shumë dyshimet për përfshirjen e tij në aktivitete të paligjshme.
Po ashtu, Veliaj nuk ka bërë postime lidhur me aktivitetet e PS-së dhe organizimin parazgjedhor për zgjedhjet e 11 majit 2025. Kjo është një indikacion i mënjanimit të tij nga fushata e PS-së dhe daljet publike me kryeministrin Edi Rama.
Distancimi mes Ramës dhe Veliajt është i dukshëm, por nuk dihet nëse kjo është një strategji e orkestruar nga të dy, apo nëse Rama ka vendosur ta “heqë vizën” Veliajt. Ky zhvillim mund të jetë një manovër për të larguar Veliajt nga vëmendja publike, derisa hetimet e SPAK të marrin drejtim, ose një hap i vërtetë në largimin e tij nga skena politike.
