Kryeministri Edi Rama u bëri thirrje vendeve të Bashkimit Europian të marrin tani vendimet politike për zgjerimin, ndërsa reformat dhe proceset e anëtarësimit të vijojnë sipas meritave të secilit vend. Në Konferencën Ndërparlamentare për zgjerimin e BE-së dhe anëtarësimin e Shqipërisë, ai tha se lënia pas e Ballkanit Perëndimor do të ishte një dështim për vetë Europën.
“Ne debatojmë shumë gjëra këtu brenda, në vendin tonë. Çdo ditë e kemi kapacitetin për të gjetur arsye që të mos jemi dakord me njëri-tjetrin, ama për një gjë kemi rënë dakord: duam të jemi pjesë e Europës”, tha Rama.
Sipas kryeministrit, vendet e rajonit mbeten të përkushtuara ndaj anëtarësimit. “Shpresoj shumë që ju të mos na lini përsëri në baltë. Nëse Europa do të lërë në baltë Ballkanin Perëndimor, nuk do të jetë thjesht dështim, por dështimi më madhor”, u shpreh ai.
Rama kërkoi që vendimet politike të mos shtyhen deri në përfundim të të gjitha procedurave. Duke iu referuar bashkimit të Gjermanisë pas rënies së Murit të Berlinit, ai tha se Europa duhet t’u japë vendeve kandidate një sinjal të qartë se i sheh si pjesë të saj. Për ta ilustruar këtë, përdori metaforën e një familjeje ku të gjithë fëmijët ulen në të njëjtën tryezë, edhe kur nuk kanë të njëjtën peshë në vendimmarrje. Mesazhin për udhëheqësit europianë e mbylli me fjalën: “Bëjeni!”.
Të merren tani dhe më pas të plotësohen proceset sipas meritave. Shtatë fëmijë ka Ursula dhe Europa ka shtatë kandidatë. Fëmijët e Ursulës u rritën në tavolinë, ajo nuk i tha vajzës shko rri me atë gangsterin rus apo vajzës të luajë me ato lodrat kineze. Ata ishin të gjithë në atë tavolinë, pavarësisht se fjala nuk i peshon te gjithëve njësoj, apo të gjithë hanë diçka.
Prandaj të gjithë duhet të jenë aty, siç thotë Helmut Koln. Nëse ti plotëson një kapitull, je anëtar për atë kapitull. Nëse nuk ke plotësuar një tjetër kapitull, je si fëmija i Ursulës. Ne shumë gjëra i kemi të përbashkëta. Nuk duhet të kujtohemi se jemi një kur kemi vetëm ndonjë sulm, a valë emigracioni. Është si veza e Kolmbit, shumë e thjeshtë, siç thotë kompania Nike: Bëjeni!”, tha Rama mes të tjerash.
Në një pjesë tjetër të fjalës, Rama iu referua edhe protestave në Shqipëri përmes simbolit të flamingove. “Jam i sigurt se jeni argëtuar mjaft kohët e fundit me flamingot, edhe pse jam i sigurt se nuk duken aq bukur sa në foto”, tha ai.
Kryeministri e lidhi këtë me atë që e cilësoi si një fazë të re për vendin, ku, sipas tij, qytetarët kërkojnë që gjërat të bëhen më mirë.
