Nga Muriel
Teatri i karrigeve nuk mund të fshehë përgjegjësinë e shtetit!
Ka diçka tronditëse në pamjen e një Kryeministri që nxjerr karrige për dialog, ndërsa mbi institucionet e shtetit rëndojnë akuza për dhunë ndaj të rinjve.
Edi Rama doli sërish përpara Kryeministrisë me karriget e tij. Zgjati dorën për dialog dhe paralajmëroi se çdo dhunues do të përgjigjet.
Çfarë ironie, zoti Rama! Karriget i nxirrni përpara kamerave, ndërsa përgjigjet i mbani larg qytetarëve!
Ju thoni se çdo dhunues duhet të përgjigjet?
Shumë mirë! Atëherë çdo dhunues i fëmijëve! Çdo dhunues i studentëve! Çdo polic që ka tejkaluar ligjin! Çdo komandant që ka urdhëruar dhunë të paligjshme! Çdo zyrtar që ka fshehur një abuzim!
Ligji nuk mund të fillojë te guri i protestuesit dhe të përfundojë te shkopi i policit!
Askush nuk ka të drejtë të godasë një polic. Por asnjë uniformë nuk i jep të drejtë askujt të godasë një student të pambrojtur apo të keqtrajtojë një të mitur.
Dhe këtu fillon pyetja që nuk mund ta mbuloni me asnjë skenografi politike:
Ku është Prokuroria?!
Sa raste të pretenduara të dhunës policore janë hetuar? Sa efektivë janë identifikuar? Sa drejtues janë marrë në përgjegjësi? Kush po verifikon pamjet dhe dëshmitë?
Prokuroria duhet të hetojë edhe atë që hedh gurin, edhe atë që godet në mënyrë të paligjshme me shkopin e shtetit!
Zoti Rama, studentët nuk janë armiqtë e Shqipërisë! Janë fëmijët e saj!
Janë djemtë dhe vajzat që prindërit i kanë rritur me sakrifica. Janë një brez që kërkon dinjitet, arsim dhe të ardhme. Kanë të drejtë t’ju kundërshtojnë, t’ju kritikojnë dhe t’ju kërkojnë dorëheqjen!
Shqipëria nuk është prona juaj. Kryeministria nuk është shtëpia juaj private. Policia nuk është instrument personal i askujt!
Dhe prindërit kanë të drejtë të kërkojnë që fëmijët e tyre të kthehen nga një protestë paqësore të sigurt, jo të frikësuar nga ata që duhet t’i mbrojnë.
Një shtet që tremb fëmijët e vet nuk demonstron forcë. Demonstron dështim moral!
Zoti Rama, nëse dora juaj është vërtet e shtrirë, kërkoni transparencë për hetimet. Garantoni ruajtjen e provave. Kërkoni përgjegjësi për çdo abuzim të provuar, pa mbrojtje politike.
Sepse dialogu nuk fillon me karrige. Fillon kur pushteti pranon t’i përgjigjet qytetarit.
Dhe qytetarët kanë të drejtë të kërkojnë drejtësi, të denoncojnë abuzimet dhe të protestojnë paqësisht, pa frikë.
Zoti Rama, Shqipërisë nuk i mungojnë karriget. I mungon llogaridhënia!
Nëse kërkoni drejtësi për policët e goditur, kërkojeni me të njëjtën forcë edhe për studentët dhe fëmijët e dëmtuar!
Çdo dhunues duhet të përgjigjet para ligjit!
Edhe kur mban uniformë! Edhe kur mban pushtet!
Pa përjashtime. Pa mbrojtje politike. Pa drejtësi me dy standarde!
