Kryeministri Edi Rama njoftoi sot uljen e çmimit të energjisë elektrike për konsumatorët familjarë, një vendim që ka nxitur reagime nga figura politike dhe analistë.
Lapaj e përshëndeti këtë lëvizje, por shprehu angazhimin për një ulje më të madhe të çmimit:
“E përshëndesim uljen e çmimit të energjisë elektrike me 1 lek nga qeveria, por i qëndrojmë angazhimit tonë për ta ulur çmimin e energjisë sa Kosova! Pra, nga 9.5 në 7.4 lekë pa TVSH. Asnjë tarifë nuk do të jetë më e lartë se në Kosovë! Sa kohë e bën Kosova, e bëjmë edhe ne!”
Në anën tjetër, Qori ofroi një këndvështrim më kritik, duke theksuar se problemi nuk është vetëm te ofertat për ulje çmimesh, por te mungesa e një modeli të qëndrueshëm ekonomik:
“Nuk mund të jetë thjesht lëmoshë. Duhet parë në kontekstin e të ardhurave. Vazhdojmë të kemi pagat dhe pensionet më të ulëta në Europë. Nuk është zgjidhje të themi ‘Rama e uli kaq’ dhe ‘ne do e ulim aq’. Na duhet një model alternativ zhvillimi. Nuk mund të jetë një politikë dritëshkurtër për të falur diçka para zgjedhjeve.”
Ndërsa Lapaj propozon konkretisht një ulje që përputhet me çmimet e Kosovës, Qori thekson se problemi shkon përtej uljes së çmimit dhe kërkon një vizion më të gjerë për të adresuar standardet e jetesës dhe pabarazinë ekonomike.
