Protestave të të rinjve u janë bashkuar sot edhe gjimnazistët në Elbasan dhe studentët në Durrës, të cilët kanë bojkotuar mësimin dhe janë mobilizuar në solidaritet me protestën e studentëve.
Në Elbasan, gjimnazistët kanë marshuar në rrugët e qytetit, duke u bërë thirrje bashkëmoshatarëve që t’u bashkohen. Tubimi, i organizuar pas thirrjeve të shpërndara në rrjetet sociale, është shoqëruar me tensione dhe raportime për dëmtim të pronës.
Policia ka ndërhyrë pas përshkallëzimit të situatës, duke shoqëruar disa prej protestuesve.
Ndërkohë, në Durrës, studentët e Universitetit “Aleksandër Moisiu” kanë nisur bojkotin e mësimit, ashtu siç kishin paralajmëruar një ditë më parë. Fillimisht, ata janë grumbulluar në oborrin e kampusit universitar në Spitallë, ku kanë bërë thirrje për pjesëmarrje në protestë.
Më pas, studentët kanë hyrë në godinën e Fakultetit Ekonomik, duke u bërë apel të rinjve në auditorë që t’u bashkohen. Mobilizimi pritet të vijojë edhe në godinat e fakulteteve të tjera, përpara marshimit drejt sheshit qendror dhe Bashkisë së Durrësit.
