Në orën 20:00 opozita do të zhvillojë protestën e rradhës para godinës së Kryeministrisë, ndërsa prej ditësh strukturat e saj janë angazhuar në terren duke ftuar qytetarët të bashkohen në tubim. Qytetarët kanë nisur që të mblidhen për këtë tubim, ku një pjesë e mirë e tyre ndodhen në selinë e PD.
Ndërkohë kryetari i PD vazhdimisht ka shpërndarë video në facebook me pamje nga ardhja e mbështetësve të opozitës nga qarqet e vendit për në Tiranë. Përmes kësaj proteste opozita kërkon që në prag të zgjedhjeve parlamentare të realizojë kërkesat për qeveri teknike, dhe thirrjen kryesore për lirimin e Sali Berishës nga masa e arrestit.
Ndërkohë nga ana tjetër për mbarëvajtjen e kësaj proteste do të angazhohen mbi 1200 forca të policisë, duke nisur nga ato të rendit, FNSH, Shqiponjat do të jenë në terren për mbarëvajtjen e protestës.
Forcat policore pritet që të vendosen njësoj si në protestat e mëhershme të opozitës, teksa me protestuesit i ndan një gardh metalik. Do të ketë kamera sigurie dhe autobotë me ujë nëse do të ketë nevojë në raste incidentesh. Në terren do të përfshihen edhe agjentët civilë, për të monitoruar mbarëvajtjen e protestës.
Segmentet rrugore të bllokara tashmë, pak përpara se të nisë protesta janë:
Bulevardi “Dëshmorët e Kombit”, sheshi “Nënë Tereza”, rruga “Ismail Qemali”, nga kryqëzimi i rrugës së Elbasanit me rrugën “Ibrahim Rugova”, rruga “Papa Gjon Pali II”, bulevardi “Zhan D’Ark” dhe bulevardi “Bajram Curri”, nga kryqëzimi i Rrugës së Elbasanit me rrugën “Ibrahim Rugova”.
