Opozita mesa duket e ka gjetur kandidatin për Bashkinë e Himarës, dhe ai është Petro Gjikuria, i propozuar nga PBDNJ.
Gjikuria është nga Drimadha, por ka jetuar jashtë vendit për shumë vite. Mësohet se ai gjithashtu ka një biznes në Amerikë dhe është pjesë e Federatës panepiriote greke. Ndërsa ditën e nesërme Vangjel Dule pritet të dalë në konferencë dhe të zyrtarizojë kandidatin e opozitës për bashkinë e Himarës.
Zgjedhjet në Bashkinë e Himarës do të mbahen më 4 gusht ndërsa sipas projektvendimit të KQZ, kandidatët do të kenë në dispozicion, vetëm 1 javë kohë për të organizuar fushatën e tyre.
Në fillim u përfol për djalin e Fredi Belerit, që të ishte si kandidat, por pas bisedimeve është vendosur për Gjikurinë.
Vangjel Tavo është kandidati i zyrtarizuar i socialistëve ndërsa në kampin opozitar sipas burimeve kandidat do të jetë Petro Gjikuria.
Zgjedhjet për Himarën do të zhvillohen pasi kryetari i zgjedhur në 14 maj të 2023, Fredi Beleri u dënua me vendim të formës së prerë me 2 vite burg për korrupsion në zgjedhje. Deri më tani emri i Petro Belerit, djalit të tij ishte më i lakuari si kandidat i mundshëm.
