Në Tiranë, kryeqyteti i premtimeve të mëdha dhe shpenzimeve të vogla për qytetarët, propaganda e Kryebashkiakut Erion Veliaj ka arritur një tjetër majë të lartë ironie. Bashkia Tiranë sapo ka shpenzuar 13 milionë lekë të vjetra për një aparat fotografik – një shifër që duket më shumë si çmimi i një vepre arti modern sesa i një mjeti për fotografi.
Mbase ky aparat do të jetë aq “magjik” sa të retushojë problemet e qytetit me të njëjtën lehtësi siç retushohen imazhet e aktiviteteve të Veliajt në rrjetet sociale. Megjithatë, çudia nuk mbaron këtu: në tender ka marrë pjesë vetëm subjekti “QuantX IT Solutions” Shpk, e cila duke mos pasur asnjë konkurrent tjetër është shpallur fituese me ofertën sa 99% të vlerës së tenderit.
Në fund të fundit, në një qytet ku ndërhyrjet në infrastrukturë janë shpesh të vonuara dhe shpenzimet e luksit duket se zënë vend të parë, ky aparat fotografik i Bashkisë Tiranë do të hyjë në historinë moderne si një nga “investimet strategjike” për të përmirësuar jetën e qytetarëve… përmes fotografive.
Ironikisht, ndërsa qytetarët përballen me mungesa në shërbime bazike, Veliaj dhe stafi i tij kanë vendosur që është më urgjente të dokumentohen bukur me një aparat që kushton aq sa mund të sigurojë një bursë studimi, riparimin e një rruge të lagjes, ose ndihma për më të pamundurit. Mbase ky aparat është simboli i përkushtimit të Bashkisë ndaj artit dhe estetikës – një përkushtim që qytetarët, për fat të keq, nuk mund ta hanë, pinë apo ecin mbi të./VNA/
