Kreu i LZHK, Dashamir Shehi, ka njoftuar se forca politike që ai drejton nuk do të bashkëpunojë me Partinë Demokratike të Sali Berishës në zgjedhjet e vitit 2025. Gjatë një interviste në News24, Shehi ka shpjeguar se LZHK ka një bashkëpunim me partinë "Djathtas 1912", e cila është krijuar nga Enkelejd Alibeaj.
Shehi theksoi se Berisha dhe mbështetësit e tij janë përpjekur të gjejnë kundërshtarët politikë anash, por sipas tij, kundërshtari kryesor është Edi Rama. Ai shtoi se Berisha ka drejtuar PD-në për një kohë të gjatë nga shtëpia dhe kjo nuk ka ndryshuar as tani që ai është rikthyer në krye të partisë.
"Berisha ka të gjitha mjetet për të bërë opozitë: ka vulën, ka zyrën dhe ligjin me listat e mbyllura. I urojmë punë të mbarë, por ne nuk do të bashkëpunojmë me të. Ka disa çështje që na ndajnë, përfshirë marrëdhëniet me ndërkombëtarët", u shpreh Shehi. Ai po ashtu theksoi se për LZHK, kundërshtari i vërtetë është Edi Rama, dhe jo Sali Berisha, i cili ka tentuar të margjinalizojë rivalët e tij.
