Në teatrin tonë politik, ku zakonisht skenari shkruhet me akuza për "tradhëti" dhe "shitje interesash", java që sapo ka nisur dhuroi një shfaqje krejtësisht të re: Konkurrencën e etheshme të kopjimit pozitiv. Nën presionin e vazhdueshëm qytetar dhe protestave që po ziejnë në rrugë, opozita parlamentare e vjetër dhe të vegjlit e rinj janë futur në një garë shpejtësie se kush e "bombardon" më parë Kuvendin me të njëjtat propozime ligjore që kënaqin njerëzit në sheshe, në ato sheshe ku politikanëve ju refuzohet mikrofoni, dhe ku pjesëmarrja e tyre realizohet cepave me stil e kujdes.
Loja nisi me një lëvizje koordinimi (ose instinkti mbijetese). Grupi Parlamentar i Partisë Demokratike, i udhëhequr në këtë aksion nga Gazment Bardhi, depozitoi zyrtarisht në Kuvend një paketë të plotë ligjore. Me një gjuhë që kërkonte të bashkonte mbrojtjen e Kushtetutës me frymën e integrimit në Bashkimin Europian, PD kërkoi mediatikisht dhe ligjërisht me urgjencë:
Shfuqizimin e ligjit për Investimet Strategjike (atë që helmon Zvërnecin e bregdetin).
Shfuqizimin e ndryshimeve në ligjin për Zonat e Mbrojtura.
Shfuqizimin e ligjit për "Paketën e Maleve".
Shfuqizimin e disa dispozitave në ligjin për Trashëgiminë Kulturore.
Për t'i vënë kapak seriozitetit (dhe për të kapur sekondat e para të lajmeve), PD nuk u mjaftua me letra në protokoll. Përmes deputetes Ina Zhupa, ata dorëzuan sot edhe një kërkesë për interpelancë urgjente me Ministrin e Mjedisit, Sofjan Jaupi, duke kërkuar llogari ballë për ballë për masakrën që po i bëhet zonave të mbrojtura si Narta e Zvërneci.
Të gjithë menduan se PD korri "ekskluzivitetin" e plotë të kauzës së rrugës dhe të ekranit. Por, llogaritë u bënë pa Arlind Qorrin.
Vetëm një ditë më pas, punonjësit e protokollit të Kuvendit përjetuan një ndjesi të fortë déjà vu. Deputeti i mbështetur nga Lëvizja Bashkë, Redi Muçi, u shfaq në institucion me një pirg letrash në dorë. Çfarë mbanin ato letra? Pothuajse të njëjtin tekst, të njëjtat kërkesa, të njëjtat argumente:
Shfuqizim për Paketën e Maleve.
Shfuqizim për Investimet Strategjike.
Shfuqizim për Zonat e Mbrojtura.
Nëse kjo do të ishte një sallë njoftimesh akademike, dikush do të bërtiste "plagjiaturë!". Kur sheh se populli nuk po lëviz nga sheshi dhe kauzat e mjedisit e të pronës publike po marrin pikë, dëshira për të qenë i pari që "vulos" kërkesat e qytetarëve kthehet në sport kombëtar.
