Në protestën e së hënës kundër projektit në Zvërnec u shënuan edhe momente tensioni mes disa të rinjve të Forumit Rinor të Partisë Demokratike dhe mbështetësve të Lëvizjes Bashkë. Pas incidentit ka reaguar zëvendëskryetarja e FRPD-së, Desada Xhetani, e cila pretendon se të rinjtë demokratë janë provokuar nga aktivistë të forcës politike të drejtuar nga Arlind Qori.
Sipas saj, përplasja nisi pasi disa aktivistë iu drejtuan grupit të FRPD-së duke kërkuar largimin e tyre nga protesta. Xhetani deklaroi se protesta ishte qytetare dhe se të rinjtë demokratë kishin marrë pjesë për të mbështetur kauzën kundër projektit në Zvërnec.
Ajo tha se thirrja që shkaktoi reagimin e mbështetësve të Lëvizjes Bashkë ishte slogani “Poshtë komunizmi”, duke pretenduar se pikërisht kjo parullë solli acarimin dhe konfrontimin verbal mes palëve.
Ngjarja shënon incidentin e parë të raportuar mes grupeve të ndryshme pjesëmarrëse në protestat e ditëve të fundit, të cilat deri tani janë karakterizuar nga pjesëmarrje e gjerë qytetare dhe prani e aktivistëve nga forca të ndryshme politike.
