Beteja shumë vjeçare e Lefter Maliqit për të hequr nga karrigia e kryesbashkiakut të Kuçovës, Kreshnik Hajdarin, vazhdon me ritme të larta, edhe pse kthesat dhe parakalimet juridike arrijnë në kufijtë e cudirave.
Sot, ai i është drejtuar sërisht kreut të KQZ-së, Ilirjan Celibashi i cili ndodhet në Zvicër, të vijë menjëherë e të marrë vendim për Kuçovën.
Notat ultimative të Maliqit, në këtë rast vijnë me firmën e tij dhe kërkojnë që Komisioneri të marrë vendim. Por pak javë më parë, ishte vetë Maliqi, i cili bashkë me avokatin e tij, Llangozi, i kërkuan Celibashit të përjashtohej nga vendimmarja, edhe pse ai është i vetmi që vendos nëse një i zgjedhur vendor ka shkelur apo jo ligjin e deklriminalizimit.
Pasi kuptuan taktikën e gabuar, përdorën KAS për ta kthyer sërish dosjen në dorë të Celibashit, nga e cila e hoqën po vetë.
Pas vendimit të fundit unanim 5-0 nga Komisioni i Ankimimeve dhe Sanksioneve (KAS) që i ktheu çështjen në tavolinë, Lefter Maliqi ka dorëzuar zyrtarisht një kërkesë urgjente pranë Komisionerit Shtetëror të Zgjedhjeve (KSHZ), Ilirjan Celibashit. Përmes një shkrese zyrtare të datës së sotme, 9 qershor 2026, Maliqi kërkon që çështja e mandatit të Kryetarit aktual të Bashkisë Kuçovë, Kreshnik Hajdari, të futet pa asnjë vonesë në rendin e ditës.
Në kërkesën e tij drejtuar Celibashit, Maliqi thekson se pas vendimit të KAS nuk ekziston më asnjë pengesë juridike për të shmangur vendimmarrjen. Mbi të gjitha, Maliqi kujton se edhe Gjykata e Lartë u shpreh qartë se kjo çështje i takon ekskluzivisht KQZ-së për t'u shqyrtuar në themel.
Maliqi e konsideron këtë kalvar si një "rast studimor të pazakontë për çdo student drejtësie", duke akuzuar institucionet për më shumë se dy vite e gjysmë zvarritje procedurale pa asnjë përgjigje përfundimtare.
Në formën e një ultimatumi, Maliqi kërkon katër pika kryesore:
Futjen e çështjes me procedurë urgjente në rendin e ditës brenda kësaj jave.
Caktimin e menjëhershëm të seancës administrative.
Marrjen e vendimit përfundimtar për heqjen ose jo të mandatit të Kreshnik Hajdarit.
Njoftimin zyrtar për çdo hap të mëtejshëm.
"Shteti i së drejtës kërkon vendime të marra brenda një afati të arsyeshëm. Kjo çështje ka tejkaluar prej kohësh çdo kufi juridik dhe institucional," përfundon Maliqi në kërkesën e tij drejtuar kryekomisionerit.
