Kuvendi i Shqipërisë i është drejtuar zyrtarisht Komisionit të Venecias për të marrë një opinion mbi projektligjin e ri “Për financimin e partive politike”, një nismë që po prezantohet nga mazhoranca si përpjekje për të vendosur më shumë kontroll mbi paratë që qarkullojnë në politikë.
Sipas njoftimit të publikuar nga Komisioni i Venecias, kërkesa është dërguar më 27 prill 2026 nga Kryetari i Kuvendit, Niko Peleshi, ndërsa draft-opinioni pritet të shqyrtohet në Sesionin e 147-të Plenar më 12–13 qershor.
Projektligji po trajtohet në bashkëpunim me Drejtorinë e Përgjithshme për të Drejtat e Njeriut dhe Sundimin e Ligjit të Këshillit të Evropës, në një moment kur financimet politike dhe mungesa e transparencës vijojnë të mbeten ndër pikat më të kritikuara të sistemit politik shqiptar.
Ndërkohë, drafti është prezantuar edhe në Komisionin e Posaçëm Parlamentar për Reformën Zgjedhore, ku fokusi kryesor lidhet me financimet që partitë marrin jashtë fushatave zgjedhore — një zonë që prej vitesh konsiderohet si “vrima e zezë” e kontrollit financiar në politikë.
Një nga nenet më të rëndësishme të projektligjit është neni 7, i cili vendos ndalime për kategori të caktuara individësh dhe subjektesh që nuk do të lejohen të financojnë partitë politike, ndërsa parashikohen edhe kufizime të reja për donacionet:
-çdo dhurim mbi 500 mijë lekë duhet të kryhet vetëm përmes sistemit bankar;
-shtetasit shqiptarë mund të japin deri në 200 mijë lekë në vit;
-personat fizikë të regjistruar sipas legjislacionit tatimor deri në 500 mijë lekë;
-personat juridikë deri në 1 milion lekë në vit kalendarik.
Megjithatë, pavarësisht kufizimeve të reja në letër, mbetet për t’u parë nëse projektligji do të arrijë realisht të frenojë financimet informale dhe ndikimin e parasë së padeklaruar në politikë, apo do të mbetet një tjetër reformë formale pa efekt praktik.
