Deklaratat e fundit të Presidentit amerikan Donald Trump mbi një marrëveshje të mundshme që synon t’i japë fund tensioneve me Iranin janë përshkruar nga burime të cituara nga agjencia gjysmëzyrtare iraniane Fars si “një përzierje e së vërtetës dhe gënjeshtrës”.
Sipas këtyre burimeve, pretendimi i Trump se Irani është i gatshëm të hapë Ngushticën e Hormuzit pa taksa nuk pasqyrohet në tekstin e marrëveshjes. Ata sqarojnë se hapja e ngushticës do të bëhej vetëm pasi Shtetet e Bashkuara të heqin kufizimet ndaj anijeve iraniane dhe në përputhje me masat e sigurisë që do të marrë Teherani.
Po ashtu, burimet e Fars e kanë cilësuar retorikën e presidentit amerikan si një përpjekje për të paraqitur një “fitore të sajuar”. Sipas tyre, në draft-marrëveshje nuk përmendet shkatërrimi i materialit bërthamor të Iranit, ndërsa parashikohen kushte të tjera, përfshirë lirimin e menjëhershëm të 12 miliardë dollarëve nga fondet e ngrira iraniane dhe një armëpushim të plotë në Liban.
Të njëjtat burime bëjnë me dije se ky memorandum mirëkuptimi ndodhet në fazat përfundimtare të miratimit në Iran, por ende nuk është marrë një vendim përfundimtar.
Nga ana tjetër, më herët në platformën Truth Social, Trump deklaroi se po përgatitej të merrte “vendimin përfundimtar” për një marrëveshje të mundshme, duke theksuar se Ngushtica e Hormuzit duhet të hapet menjëherë dhe se uraniumi i pasuruar duhet të shkatërrohet.
Ndërkohë, një burim iranian për Reuters ka kundërshtuar këto pretendime, duke deklaruar se marrëveshja nuk përfshin kushte të lidhura me programin bërthamor të Iranit.
