Presidenti i Rumanisë, Nicușor Dan, ka thirrur një mbledhje urgjente të Këshillit Suprem të Mbrojtjes, takim i cili po zhvillohet aktualisht, raportojnë mediat rumune. Paralelisht, ambasadori rus në Bukuresht është thirrur për sqarime, pasi një dron rus goditi një pallat banimi në territorin rumun, duke lënë të paktën dy persona të plagosur.
Kjo nuk është hera e parë që ambasadori rus thirret nga autoritetet rumune, por në Bukuresht po qarkullojnë gjithnjë e më shumë diskutime se reagimi i kësaj here mund të jetë më i ashpër, duke përfshirë edhe mundësinë e dëbimit të ambasadorit rus.
Një veprim i tillë do të konsiderohej një lëvizje diplomatike shumë e fortë, megjithatë analistët vlerësojnë se është pak e mundshme që Rumania ta ndërmarrë një hap të tillë e vetme, pa konsultime dhe koordinim paraprak me aleatët e saj në Bashkimin Europian dhe NATO.
Presidentja e Komisionit Europian, Ursula von der Leyen, deklaroi se “lufta agresive e Rusisë ka kaluar një tjetër vijë të kuqe”, ndërsa NATO dënoi atë që e cilësoi si “sjellje të papërgjegjshme të Rusisë”.
Nga ana tjetër, shefja e politikës së jashtme të Bashkimit Europian, Kaja Kallas, deklaroi se incidenti përfaqëson një “shkelje flagrante dhe serioze të sovranitetit të Rumanisë dhe hapësirës ajrore europiane”.
