Presidenti i Rumania, Nicușor Dan, ka shpallur “non grata” konsullin e përgjithshëm rus në qytetin e Konstancës dhe ka vendosur mbylljen e konsullatës ruse në këtë qytet bregdetar. Vendimi u mor pas një mbledhjeje të Këshillit Suprem të Mbrojtjes, pas incidentit ku një dron rus goditi një pallat banimi në Galac, pranë kufirit me Ukrainën, duke plagosur dy persona.
Sipas presidentit rumun, përgjegjësia për incidentin i takon plotësisht Rusisë. Autoritetet rumune e kanë cilësuar ngjarjen si një shkelje serioze të sigurisë kombëtare dhe të hapësirës së tyre ajrore.
Reagimi nga Moska nuk vonoi. Ministria e Jashtme ruse bëri të ditur se do t’i përgjigjet vendimit të Bukureshtit, duke lënë të kuptohet se mund të merren masa reciproke ndaj diplomatëve rumunë. Rusia ka ndjekur të njëjtën praktikë edhe në raste të mëparshme përplasjesh diplomatike me Rumaninë dhe vende të tjera të NATO-s.
Përplasja e re diplomatike vjen në një moment tensionesh në rritje në krahun lindor të NATO-s, ndërsa incidenti me dronin në Galac konsiderohet një nga rastet më serioze që ka prekur drejtpërdrejt territorin rumun që nga nisja e luftës në Ukrainë.
