TIVAT, Mali i Zi - Kryeministri shqiptar Edi Rama ka hedhur poshtë protestat në rritje kundër resortit luksoz të planifikuar nga Jared Kushner, duke i cilësuar ato si një fushatë politike e nxitur nga kritikët e presidentit amerikan Donald Trump. Sipas tij, projekti nuk paraqet rrezik për flamingot apo për jetën e egër në zonë.
Ditët e fundit, mijëra shqiptarë kanë protestuar kundër planeve të Kushnerit për zhvillimin e një resorti luksoz në ishullin e Sazan dhe në bregdetin e Zvërnec pranë Vlorës. Lëvizja është quajtur nga shoqëria civile dhe media ndërkombëtare si “revolucioni i flamingove”, pasi zona përbën një habitat të rëndësishëm për këta zogj.
Në një intervistë për POLITICO gjatë samitit BE–Ballkani Perëndimor në Tivat, Rama mbrojti projektin, duke deklaruar se politika e tij për tërheqjen e investimeve të huaja në turizëm është e drejtë dhe se kritikat ndërkombëtare janë të ekzagjeruara.
“Po të mos ishte Jared, nuk do t’ia dinin fare se çfarë po ndodh në Shqipëri”, tha Rama.
Ai pretendoi se “Urrejtësit e Trumpit” kanë ndihmuar në amplifikimin e protestave, ndërsa vetë kauzën e mbrojtjes së mjedisit e quajti fisnike, por jo kritikat ndaj projektit.
Resorti i planifikuar, i mbështetur nga investitorë nga Katari dhe Shqipëria, mund të përfshijë deri në 10 mijë dhoma hoteli dhe vila. Projekti ndodhet në një ekosistem natyror që dikur gëzonte mbrojtje të posaçme dhe ku jetojnë flamingo, më shumë se 200 lloje shpendësh shtegtarë, foka mesdhetare dhe breshka detare që folezojnë në zonë. Organizatat mjedisore paralajmërojnë se habitatet e këtyre specieve do të dëmtohen nga ndërtimet.
Rama mbrojti gjithashtu ndryshimet e vitit 2024 në ligjin për zonat e mbrojtura, të cilat hapën rrugën për zhvillime turistike në disa prej këtyre territoreve. Ai theksoi se prioritet janë investitorët e huaj, sepse sipas tij ata sjellin para për shqiptarët dhe për ekonominë e vendit.
“Të huajt janë përparësia e parë, sepse ata sjellin para në vend për shqiptarët”, deklaroi ai, duke shtuar se Prodhimi i Brendshëm Bruto i Shqipërisë është trefishuar që kur ai mori drejtimin e qeverisë në vitin 2013.
Kryeministri tha se nuk ka pasur kontakte me Kushnerin që nga fillimi i protestave dhe mohoi pretendimet se projekti lidhet drejtpërdrejt me të apo me bashkëshorten e tij, Ivanka Trump.
“Ai ka punët e veta për të bërë. Ai dhe Ivanka nuk kanë të bëjnë fare me gjithë këtë histori, e cila është tërësisht e rreme dhe e fabrikuar”, tha Rama, duke kujtuar se në projekt janë të përfshirë edhe investitorë të tjerë, përfshirë kompaninë Power Holding'.
Sipas Ramës, në protesta është shfaqur edhe një narrativë antisemite për shkak të origjinës hebraike të Kushnerit dhe rolit të tij në marrëveshjet e Abrahamit mes Izraelit dhe disa vendeve arabe.
Ai akuzoi gjithashtu Iranin se po merr pjesë në një “luftë hibride” dezinformimi kundër projektit, duke përhapur teori konspirative, përfshirë pretendimin se zona do të përdoret për sistemimin e palestinezëve nga Gaza.
Megjithatë, protestuesit dhe organizatat e shoqërisë civile kanë deklaruar se rastet e izoluara të mesazheve antisemite nuk përfaqësojnë lëvizjen në tërësi.
Rama këmbënguli se ndikimi social dhe ai mbi biodiversitetin po monitorohen me kujdes dhe kundërshtoi emërtimin “revolucioni i flamingove”, duke argumentuar se numri i protestuesve është fryrë nga dezinformimi.
Ai shtoi se asnjë nga liderët evropianë të pranishëm në samitin e Tivatit nuk e ka ngritur këtë çështje gjatë takimeve.
Sa i përket aspiratës së Shqipërisë për t’u anëtarësuar në Bashkimin Evropian deri në vitin 2030, Rama tha se nuk beson se shqetësimet mjedisore do ta pengojnë këtë proces.
“Liderët evropianë do të mund ta shohin me sytë e tyre se si flamingot dhe zhvillimi bashkëjetojnë bukur së bashku”, u shpreh ai.
I pyetur nëse do të organizonte ndonjë samit në resortin e ardhshëm, Rama u përgjigj me humor: “Ky nuk do të jetë Mar-a-Lago-ja ime.”
