I penduari i drejtësisë, Nuredin Dumani, ka vijuar dëshminë e tij përpara Gjykatës së Posaçme, duke rrëfyer krimet e kryera, urdhëruesit dhe ekzekutuesit e tyre. Gjatë një seance me dyer të mbyllura, Dumani deklaroi se në vitin 2013 kishte krijuar miqësi me Festim dhe Petrit Qolin, pasi ata kishin paguar një avokat për të ndërhyrë në sistemin e drejtësisë me qëllim lirimin e tij nga burgu. Sipas tij, lirimi u mundësua duke paraqitur një raport mjekësor të rremë si i sëmurë.
Dumani i akuzon vëllezërit Qoli si urdhërues të vrasjes së Fatmira Dedës, e cila kërkonte drejtësi për vrasjen e djalit të saj dhe dyshonte se krimin e kishte kryer Festim Qoli. Ai shtoi se lokali i Qolëve ishte një vend i frekuentuar nga politikanë dhe ministra, por nuk dha emra konkretë.
Dëshmia e tij shkaktoi debate të ashpra mes Dumanit dhe të pandehurve të tjerë, të cilët e konsiderojnë atë të pabesueshëm. Pavarësisht polemikave, Nuredin Dumani vijon dëshminë e tij me dyer të mbyllura.
