Vajza e ish-kryeministrit Sali Berisha, Argita Malltezi, u paraqit sot në Prokurorinë e Posaçme kundër Korrupsionit dhe Krimit të Organizuar (SPAK). Pas përfundimit të seancës, Malltezi dha një deklaratë për mediat, duke theksuar se procedimi ndaj saj është mbyllur dhe duke kërkuar sqarime nga SPAK lidhur me një video të përfolur.
“Kanë vendosur mbylljen e procedimit. Pyeta nëse ekziston një video e tillë dhe nëse SPAK e disponon, pasi thuhet se është gjetur në shtëpinë e një gazetari të larguar nga Shqipëria. Unë vetë nuk e kam këtë video. Pse SPAK nuk e pranon që nuk ekziston?”, deklaroi ajo.
Malltezi sqaroi se ishte thirrur në cilësinë e një personi që mund të ketë dijeni, por e konsideroi këtë një tentativë për të mbrojtur gjyqtaren Irena Gjoka. Sipas saj, SPAK po përpiqet “të lajë fytyrën” e kësaj gjyqtareje.
Ajo nuk dha më shumë detaje rreth çështjes, por theksoi se do të ndjekë zhvillimet me kujdes.
