Pas denoncimeve të qytetarëve në rrjet dhe publikimit të pamjeve, kanali shkarkues në zonën e plazhit të Hamallajt, pranë ValaMar, është mbyllur me një barrierë rëre.
Në pamjet e bëra publike shihej uji me ngjyrë të errët që dilte nga kanali dhe përhapej në vijën bregdetare, duke ngritur shqetësime për ndotjen e zonës.
Pas shpërndarjes së videos, në zonë është shfaqur një mjet i rëndë, i cili ka ndërhyrë duke mbyllur grykëderdhjen e kanalit me rërë.
Disa orë më vonë, Shoqëria Rajonale Ujësjellës Kanalizime Durrës reagoi me një njoftim zyrtar, ku pranoi se në zonën e plazhit të Hidrovorit Hamallaj ishte konstatuar ngjyrë e errët e ujit në një segment të vijës bregdetare.
Megjithatë, ndërmarrja mohoi që të bëhej fjalë për ujëra të zeza. Sipas saj, Hidrovori Hamallaj gjatë verifikimit ka qenë i mbyllur dhe pa shkarkime aktive drejt detit.
SHRUKD pretendon se ngjyrosja e errët është shkaktuar nga baltë, llumra dhe sedimente të akumuluara në kanal, të cilat janë trazuar dhe transportuar drejt bregdetit nga baticat, zbaticat, erërat e forta dhe dallgëzimi.
Por ky shpjegim ka ngritur pikëpyetje, pasi banorët e zonës thonë se prej rreth dy javësh nuk ka pasur reshje shiu që mund të justifikonin një prurje të tillë të papritur në kanal.
Në njoftim thuhet gjithashtu se rezidencat në zonë janë të lidhura me rrjetin e kanalizimeve dhe se ujërat e ndotura përcillen drejt Impiantit të Trajtimit të Ujërave të Ndotura në Lalëz, i cili sipas ndërmarrjes është në funksionim 24 orë në 24.
Por mbyllja e kanalit vetëm pas publikimit të pamjeve ka shtuar dyshimet mbi situatën reale në terren dhe mbi arsyen pse ndërhyrja u krye vetëm pasi ndotja u denoncua publikisht.
