Zjarri masiv që përfshiu Malin e Krujës dhe për disa orë kërcënoi banesa, biznese dhe Spitalin e Krujës është vendosur plotësisht nën kontroll që prej orës 06:00 të mëngjesit.
Ministria e Mbrojtjes bëri të ditur se situata në terren është tashmë e qetë, ndërsa një vatër e mbetur në pjesën e sipërme të malit po menaxhohet nga ajri me mbështetjen e dy helikopterëve të Forcës Ajrore.
Situata gjatë orëve të mëparshme ishte alarmante, pasi flakët, të favorizuara edhe nga era, përparuan drejt zonave të banuara, duke rrezikuar banesa, magazina, biznese dhe një pikë shpërndarjeje gazi.
Në rrezik u vu edhe Spitali i Krujës, pasi zjarri u afrua deri në rreth 50 metra nga godina. Për shkak të situatës, pacientët u evakuuan dhe u transportuan drejt Tiranës, ndërsa qindra banorë u larguan nga zonat e rrezikuara.
Për përballimin e zjarrit u zhvillua një operacion i gjerë gjatë gjithë natës. Mbi 200 efektivë zjarrfikës dhe më shumë se 200 efektivë të Forcave të Armatosura punuan pa ndërprerje në të gjithë perimetrin e prekur, ndërsa operacioni u mbështet edhe nga ajri me dy helikopterë.
Sipas të dhënave të deritanishme, pavarësisht përmasave të zjarrit dhe rrezikut të madh, nuk raportohet për persona të lënduar dhe asnjë banesë nuk është përfshirë nga flakët.
Dëmet materiale rezultojnë të kufizuara në një godinë të shkrumbuar, konkretisht një magazinë në pronësi të një biznesi.
Ndërkohë, policia ka arrestuar personin e dyshuar si autor të zjarrvënies, ndërsa vijojnë procedurat për zbardhjen e plotë të rrethanave të ngjarjes.
Forcat në terren dhe mjetet ajrore po vijojnë punën për eliminimin e vatrës së mbetur në pjesën e sipërme të Malit të Krujës dhe për të shmangur çdo mundësi riaktivizimi të flakëve.
