Protesta kundër projektit turistik në Nartë ka hyrë në një fazë të re politike. Mbrëmjen e së dielës, qindra qytetarë u mblodhën para Kryeministrisë, duke e zhvendosur debatin nga kantieri i Zvërnecit në zemër të Tiranës. Mes thirrjeve të protestuesve nuk munguan sloganet kundër klasës politike në tërësi, përfshirë edhe parullat “Rama në burg, Berisha në burg”, duke treguar se pakënaqësia e një pjese të pjesëmarrësve nuk drejtohet vetëm ndaj qeverisë, por ndaj modelit politik që ka dominuar vendin prej dekadash.
Megafoni i protestës u mbajt kryesisht nga aktivistë jo politikë, të cilët njoftuan se një tjetër tubim do të zhvillohet edhe sot para Kryeministrisë. Ndërkohë, e vetmja forcë politike që u përfshi qartësisht dhe në mënyrë të dukshme në protestën e mbrëmshme ishte Lëvizja Ndryshe, aktivistët e së cilës ishin ndër më aktivët në terren.
Nga ana tjetër, kryeministri Edi Rama ka njoftuar se do të dalë sot në një konferencë për shtyp për të paraqitur qëndrimin e qeverisë lidhur me projektin e Nartës dhe polemikat që kanë shpërthyer rreth tij. Konferenca pritet me interes të veçantë pas tensioneve të ditëve të fundit dhe pas reagimit të gjerë publik që shkaktuan pamjet e përplasjes mes protestuesve dhe forcave të sigurisë.
Në kontrast me intensitetin e debatit publik, opozita e drejtuar nga Sali Berisha nuk ka bërë deri tani asnjë reagim zyrtar për zhvillimet e 48 orëve të fundit. Kjo përbën një rast të pazakontë për Berishën, i cili zakonisht komenton pothuajse çdo zhvillim politik apo publik në vend. Heshtja e opozitës kryesore ka ngritur pikëpyetje mbi strategjinë që ajo do të ndjekë përballë një proteste që po merr gjithnjë e më shumë dimensione politike.
Ndërkohë, pas jehonës së madhe që mori dhuna ndaj një protestuesi gjatë ngjarjeve në Nartë dhe reagimeve që pasuan, përfshirë edhe ndërhyrjen e qeverisë greke, rrethimi me tela në zonën e konfliktit u hoq, në atë që u konsiderua si reagimi i parë konkret ndaj presionit publik.
Tashmë vëmendja është zhvendosur te protesta e paralajmëruar për sot. Nëse mbrëmë Lëvizja Ndryshe ishte e vetmja forcë politike e pranishme në mënyrë të organizuar, mbetet për t’u parë nëse partitë e tjera të reja do t’i bashkohen kësaj kauze dhe nëse protesta do të mbetet një lëvizje qytetare apo do të shndërrohet në një test të ri politik për opozitën shqiptare.
