Në një kohë kur universitetet në gjithë botën flasin për digjitalizim, akses dhe mbështetje teknologjike për studentët, Universiteti i Tiranës ka zgjedhur një tjetër rrugë: të tërhiqet nga një prej shërbimeve bazë që për më shumë se një dekadë ka qenë pjesë e jetës akademike.
Pikërisht në prag të sezonit të provimeve, UT ka njoftuar ndërprerjen e licencës falas Microsoft Office 365 A1 Plus, duke i lënë studentët, pedagogët dhe administratën pa akses në versionet desktop të Word, Excel, PowerPoint dhe Outlook.
Për vite me radhë, këto aplikacione nuk kanë qenë luks. Kanë qenë mjeti bazë i punës akademike: aty janë shkruar temat e diplomës, janë përgatitur leksionet, janë ndërtuar projektet, janë mbajtur të dhënat administrative dhe janë zhvilluar prezantimet shkencore.
Tani, sipas njoftimit zyrtar, përdoruesit me adresat @unitir.edu.al do të kenë akses vetëm në versionet web/cloud të Office-it, ndërsa kush dëshiron aplikacionet e instaluara në kompjuter duhet të blejë vetë licencën.
Pra, një shërbim që Universiteti e kishte garantuar falas për afro 10 vite, zhduket në heshtje dhe kostoja transferohet tek studentët dhe stafi.
Dhe kjo ndodh në momentin më të papërshtatshëm të mundshëm.
Në kulmin e provimeve, kur mijëra studentë punojnë me materiale akademike, dorëzojnë detyra, përgatisin diploma apo projekte kursi, universiteti u thotë se tashmë duhet të përshtaten me kufizimet e versioneve online ose të paguajnë nga xhepi i tyre.
Në njoftim, Universiteti përpiqet ta paraqesë situatën si një “ndryshim administrativ” që lidhet me politikat globale të Microsoft-it. Teknikisht mund të jetë e vërtetë. Por për studentin që duhet të dorëzojë diplomën, për pedagogun që përgatit leksionet apo për administratën që menaxhon dokumentacionin, realiteti është shumë më i thjeshtë: një shërbim falas nuk ekziston më.
Dhe në një universitet publik, ku shumë studentë mezi përballojnë kostot bazë të studimeve, edhe një licencë software-i kthehet në barrë.
Në fund, ajo që mbetet është një ironi e hidhur: në epokën e “transformimit digjital”, Universiteti i Tiranës po u kërkon studentëve dhe pedagogëve të bëjnë më shumë… me më pak.
