Katedralja Notre Dame në Paris, e dëmtuar rëndë nga zjarri shkatërrues më 15 prill 2019, do të rihapet më 7 dhjetor pas një projekti restaurimi që zgjati pesë vite. Presidenti francez, Emmanuel Macron, i cili premtoi ta rindërtonte brenda këtij afati, mbikëqyri punimet që kushtuan rreth 1 miliard euro, të financuara nga donacione globale.
Ceremonia e hapjes do të mirëpresë 2,000 të ftuar, përfshirë liderë botërorë si presidenti amerikan Joe Biden, Donald Trump, i sapozgjedhur president, presidenti turk Rexhep Tajip Erdogan dhe Mbreti Charles III. Ndërkohë, presidenti rus Vladimir Putin dhe kryeministri izraelit Benjamin Netanyahu nuk janë ftuar. Papa Françesku gjithashtu refuzoi ftesën e Macron-it, duke preferuar të vizitojë ishullin Korsika më 15 dhjetor për një konferencë mbi besimin në Mesdhe, vendim që ngjalli kritika dhe spekulime mbi raportet e tensionuara me Macron-in.
Ceremonia më 7 dhjetor do të përfshijë fjalime nga Macron dhe Kryepeshkopi i Parisit Laurent Ulrich, një ritual tradicional të hapjes së dyerve dhe një shfaqje dritash në fasadën e katedrales. Vizitat publike do të fillojnë më 8 dhjetor, me një sistem rezervimesh për menaxhimin e turmave.
Notre Dame, e përfunduar në vitin 1345, është një nga monumentet më të rëndësishme të krishterimit. Çdo vit, ajo priste rreth 13 milionë vizitorë, të cilët vinin për të parë thesaret e saj historike, si skulpturën e Virgjëreshës Mari, dritaret ikonike me trëndafila dhe mobiljet mesjetare. Si seli e Kryepeshkopisë së Parisit, katedralja mbetet simbol i trashëgimisë kulturore dhe shpirtërore të Francës.
