Detaje të reja tronditëse kanë dalë në dritë për rastin e vogëlushes 2-vjeçare Beatrice, e cila u gjet e pajetë më 9 shkurt në Bordighera të Italisë. Hetimet e autoriteteve italiane flasin për muaj të tërë dhune, neglizhence dhe keqtrajtimi jo vetëm ndaj Beatrices, por edhe ndaj dy motrave të saj, 9 dhe 7 vjeç.
Sipas prokurorëve të Imperias, nëna e fëmijëve, Emanuela Aiello, dhe partneri i saj Emanuel Iannuzzi akuzohen për keqtrajtim të vazhdueshëm ndaj tre vajzave. Në dokumentet e hetimit përshkruhen episode me shuplaka, izolim të fëmijëve në dhomë dhe detyrim për të kryer punët e shtëpisë.
Një nga elementët më tronditës të dosjes është fakti se në cigaren që, sipas një videoje të sekuestruar nga hetuesit, Iannuzzi ia dha për të pirë vogëlushes Beatrice, kishte marijuanë. Gjithashtu, hetimet tregojnë se ndërsa vajza e vogël ishte në gjendje të rënduar shëndetësore dhe lihej nën kujdesin e motrave të saj, të rriturit konsumonin alkool dhe lëndë narkotike.
Dëshmitë e dy motrave më të mëdha kanë rezultuar vendimtare për ecurinë e hetimit. Gjykata ka vlerësuar se ato kanë pësuar trauma të rënda psikologjike dhe nuk kanë shprehur asnjë dëshirë për t’u kthyer në banesën ku jetonin. Vajzat ndodhen aktualisht nën mbrojtjen e shërbimeve sociale.
Ndërkohë, babai i tyre, Maurizio Rao, i cili ndodhet në burg për një çështje të palidhur me vdekjen e Beatrices, ka deklaruar përmes avokatit të tij se dëshiron të takojë sërish dy vajzat dhe ka kërkuar që përgjegjësit të ndëshkohen me dënime shembullore.
