Irani ka ritheksuar mbështetjen e tij për Libanin dhe Hezbollahun, duke deklaruar se çdo marrëveshje e mundshme me Shtetet e Bashkuara për t’i dhënë fund konfliktit rajonal do të përfshijë edhe ndalimin e sulmeve në territorin libanez. Qëndrimi i Teheranit vjen pas njoftimit të presidentit amerikan Donald Trump për një marrëveshje armëpushimi mes Izraelit dhe Hezbollahut.
Mesazhi u përcoll nga kryetari i Parlamentit iranian, Mohammad Bagher Ghalibaf, gjatë një bisede telefonike me homologun e tij libanez, Nabih Berri. Sipas mediave iraniane, Ghalibaf theksoi se çdo marrëveshje për përfundimin e luftës mes Iranit dhe SHBA-së do të përfshijë ndërprerjen e sulmeve në të gjitha frontet, me fokus të veçantë Libanin. Ai paralajmëroi se nëse Izraeli vijon operacionet ushtarake, Teherani mund të tërhiqet nga procesi i negociatave.
Zyrtari iranian nënvizoi se Teherani synon arritjen e një armëpushimi të plotë në Liban, veçanërisht në jug të vendit, ndërsa e cilësoi marrëdhënien mes Iranit dhe Libanit si të pandashme. Nga ana tjetër, kryetari i Parlamentit libanez, Nabih Berri, shprehu mirënjohjen për mbështetjen iraniane, duke vlerësuar rolin e Teheranit në një moment të ndjeshëm për vendin.
Analistët e shohin komunikimin me Berrin, njëherazi kreu i lëvizjes Amal dhe aleat i Hezbollahut, si një sinjal të qartë se Irani nuk ka ndërmend të distancohet nga organizata shiite gjatë negociatave me Uashingtonin. Megjithatë, pavarësisht diskutimeve për armëpushim, raportimet për lëshime raketash nga Libani drejt Galilesë dhe Lartësive të Golanit kanë ngritur pikëpyetje mbi zbatimin praktik të marrëveshjeve dhe garancive të përmendura nga palët.
