Një incident i pazakontë ka përshkallëzuar tensionet mes Francës dhe Rusisë, pasi presidenti francez Emmanuel Macron njoftoi se autoritetet franceze kanë interceptuar një cisternë ruse nafte në ujërat e Oqeanit Atlantik.
Pas deklaratës së Macron, ka reaguar Ambasada ruse në Paris, e cila konfirmoi se anija quhet “Tagor” dhe se kapiteni i saj është shtetas rus. Moska bëri të ditur se ka kërkuar zyrtarisht nga autoritetet franceze informacion mbi fatin e ekuipazhit dhe praninë e mundshme të shtetasve të tjerë rusë në bord, por deri tani nuk ka marrë asnjë përgjigje.
“Ambasada ka kërkuar zyrtarisht informacion nga autoritetet franceze mbi praninë e shtetasve rusë në ekuipazh. Deri tani nuk kemi marrë asnjë përgjigje nga Ministria e Jashtme franceze”, thuhet në deklaratën e publikuar në Telegram nga ambasada ruse.
Sipas Moskës, autoritetet franceze nuk kanë dërguar asnjë njoftim zyrtar për masat e marra ndaj anijes, as për bazën ligjore të operacionit. Për këtë arsye, diplomacia ruse kërkon sqarime të menjëhershme nga Parisi.
Ndalimi i cisternës u njoftua më herët nga vetë Emmanuel Macron, i cili tha se operacioni lidhej me zbatimin e masave të sigurisë dhe kontrollit në Atlantik. Megjithatë, deri tani nuk janë bërë publike detaje të plota mbi arsyet konkrete të interceptimit, ngarkesën e anijes apo destinacionin e saj.
Ngjarja ndodh në një klimë të tensionuar ndërkombëtare, ku vendet perëndimore kanë shtuar kontrollet ndaj anijeve ruse për shkak të sanksioneve të vendosura pas luftës në Ukrainë. Në të njëjtën kohë, Moska i konsideron shpesh këto veprime si masa armiqësore dhe pjesë e presionit politik ndaj Rusisë.
Autoritetet franceze ende nuk kanë publikuar një raport të detajuar mbi operacionin, ndërsa Moska po kërkon akses konsullor dhe informacion të plotë për ekuipazhin e anijes “Tagor”.
