Libani ka njoftuar arritjen e një armëpushimi të pjesshëm mes Hezbollahut dhe Izraelit, në një përpjekje për të ulur tensionet e vazhdueshme në rajon.
Përmes një deklarate, Ambasada e Libanit në Uashington theksoi se marrëveshja nuk nënkupton përfundimin e konfliktit, por përbën një hap drejt reduktimit të përshkallëzimit të situatës. Autoritetet libaneze i bënë thirrje Izraelit të ndalojë sulmet ndaj Bejrutit dhe periferive të tij, të cilat kontrollohen nga Hezbollahu, ndërsa kërkuan gjithashtu që grupi i mbështetur nga Irani të ndërpresë sulmet kundër territorit izraelit.
Përplasjet mes Izraelit dhe Hezbollahut nisën më 2 mars, si pjesë e konfliktit më të gjerë në rajon, dhe që prej asaj kohe janë ndërthurur me zhvillimet e tjera ushtarake dhe diplomatike.
Irani ka këmbëngulur se ndërprerja e operacioneve ushtarake izraelite në Liban duhet të jetë një kusht thelbësor për çdo marrëveshje që synon t’i japë fund konfliktit. Nga ana tjetër, Shtetet e Bashkuara kanë deklaruar se situata në Liban dhe konfliktet e tjera në rajon duhet të trajtohen si çështje të ndara.
Ministri i Jashtëm iranian, Abbas Araqchi, u shpreh se një armëpushim mes Iranit dhe Shteteve të Bashkuara do të ndikonte drejtpërdrejt në të gjitha frontet e tensionit në rajon, përfshirë edhe Libanin.
“Armëpushimi midis Iranit dhe Shteteve të Bashkuara të Amerikës është padyshim një armëpushim në të gjitha frontet, përfshirë Libanin”, deklaroi Araqchi.
