Ministri i Punëve të Brendshme Besfort Lamallari ka nxjerrë urdhrin për shpalljen “person i padëshiruar në Republikën e Shqipërisë” për një periudhë 15-vjeçare ndaj shtetases Ikball Huduti (Berisha).
Sipas informacionit të bërë publik, vendimi është marrë mbi bazën e të dhënave dhe informacioneve të grumbulluara nga institucionet përkatëse, ku veprimtaria e shtetases vlerësohet si rrezik potencial për sigurinë kombëtare, rendin dhe sigurinë publike në Republikën e Shqipërisë.
Urdhri i ministrit Lamallari i është përcjellë për zbatim Policia e Shtetit si dhe strukturave të Drejtorisë së Kufirit dhe Migracionit, të cilat do të marrin masat përkatëse në lidhje me zbatimin e vendimit administrativ.
Në njoftime të mëparshme dhe referenca publike, shtetasja në fjalë është përmendur për lidhje të pretenduara me figura dhe struktura të lidhura me regjimin iranian, si dhe për pjesëmarrje apo deklarime publike të konsideruara kritike ndaj rendit kushtetues në Shqipëri. Ajo është shfaqur gjithashtu në aktivitete publike krah ish-presidentit iranian Mahmoud Ahmadinejad.
Autoritetet nuk kanë dhënë detaje të mëtejshme mbi natyrën e plotë të informacionit që ka çuar në këtë vendim, duke e trajtuar çështjen si pjesë të procedurave të brendshme të sigurisë shtetërore.
