Pas raportimeve për 60 studentë të Akademisë së Sigurisë që kanë shfaqur shqetësime shëndetësore, kompania e kateringut “Sori-Al” ka reaguar duke hequr çdo përgjegjësi për situatën, ndërsa ka listuar një sërë faktorësh të mundshëm “jashtë menusë së saj”.
Në një deklaratë të gjatë, kompania thekson se gjatë monitorimeve të kryera ka konstatuar raste të futjes dhe konsumimit në ambientet e Akademisë të produkteve ushqimore të porositura nga jashtë, duke lënë të nënkuptohet se burimi i problemit mund të mos jetë ushqimi i ofruar prej saj.
Po ashtu, “Sori-Al” përmend edhe disa mangësi higjieno-sanitare në ambientet e konsumit, si mungesa e ujit të ngrohtë dhe detergjentit për larjen e duarve, si dhe faktin se studentët shpesh konsumojnë ushqimin menjëherë pas stërvitjes.
Sipas kompanisë, këto rrethana “duhet të jenë pjesë e hetimit objektiv”, duke theksuar se siguria ushqimore nuk varet vetëm nga prodhimi dhe shpërndarja e ushqimit, por nga i gjithë zinxhiri i konsumit – përfshirë edhe mënyrën si hahet.
“Çdo ushqim i konsumuar jashtë sistemit të kontrolluar mund të përbëjë faktor rreziku”, thuhet në deklaratë, ndërsa kompania nënvizon se prodhon mbi 1.000 racione në ditë dhe ka 23 vite aktivitet pa episode të ngjashme të përsëritura në kohë të shkurtër.
Ndërkohë, “Sori-Al” kërkon që institucionet të forcojnë kontrollin brenda Akademisë për futjen e ushqimeve nga jashtë dhe të kryejnë hetim të plotë “pa paragjykime”, duke pritur edhe analizat laboratorike për të përcaktuar shkakun e ngjarjes.
Kompania përfundon reagimin duke theksuar gatishmërinë për bashkëpunim me autoritetet dhe duke kërkuar që çdo përfundim të bazohet në prova shkencore dhe laboratorike.
