Në librin e saj të ri, Melania Trump kujtoi momentin kur u takua për herë të parë me Donald Trump në një festë të organizuar gjatë ‘Javës së Modës’ në New York, në vitin 1998. Takimi, i cili ishte krejt i papritur, ndodhi ndërsa Donald Trump ishte në shoqërinë e një gruaje tjetër, por kjo nuk e pengoi atë të flirtonte me Melanian.
Sipas rrëfimit të saj, Trump iu afrua asaj dhe mikut të saj, pavarësisht se ishte në shoqërinë e një gruaje tjetër. “Përshëndetje. Unë jam Donald Trump,” i tha ai kur arriti në tavolinën e saj. Edhe pse e njihte emrin e tij, Melania pranoi se nuk dinte shumë për të.
Trump zgjati dorën dhe filloi një bisedë, duke pyetur për jetën e saj në New York, shtëpinë në Slloveni dhe udhëtimet që kishte bërë nëpër botë. Melania kujton se, pavarësisht se ishte një takim i shkurtër, Trump la një përshtypje të mirë. “Që nga momenti që filloi biseda jonë, unë u mahnita nga sharmi dhe lehtësia e tij. Më bëri të ndihesha sikur isha në qendër të botës së tij,” theksoi ajo.
Pavarësisht se ishte i shoqëruar me një grua tjetër, Trump e shfrytëzoi një moment kur ajo u largua për të kërkuar numrin e Melanias. Por, në një kthesë të papritur të ngjarjeve, Melania e refuzoi kërkesën e tij. Kjo e befasoi Donaldin, por Melania vendosi ta kthente situatën në favor të saj duke i kërkuar numrin e tij. Donald Trump pranoi me kënaqësi, por me një kusht: “Do të të jap numrin tim nëse më premton se do të më telefonosh,” i tha ai.
Ky takim i parë duket se la një shenjë të thellë në marrëdhënien e tyre, duke u bërë fillimi i një lidhjeje që më vonë do të përfundonte në martesë.
