SHBA dhe BE reagojnë ashpër lidhur me vendimin e Parlamentit që nuk votoi për dërgimin në Kushtetuese të mandatit të deputetes Olta Xhaçka. Selitë diplomatike i tërheqin vëmendjen qeverisë dhe institucioneve që të respektojnë vendimet e gjykatave.
"Ambasada e SHBA ndan shqetësimin e Delegacionit të Bashkimit Europian lidhur me vendimin e Parlamentit të Shqipërisë për të shpërfillur një vendim të Gjykatës Kushtetuese. Siç vërejti kohët e fundit Kryetarja e Parlamentit, marrja e hapave të nevojshme për vendimet e Gjykatës Kushtetuese është përgjegjësi qendrore e Parlamentit dhe është gjithashtu jetike për ndarjen e pushteteve. Qeveria dhe institucionet duhet të respektojnë rregullat, ligjet, vendimet e gjykatave dhe kushtetutën – të gjitha të cilat janë aty për të siguruar që sistemi demokratik është i shëndetshëm dhe lulëzon", thuhet në reagimin e ambasadës amerikane në Tiranë.
Gjykata Kushtetuese e detyronte me një vendim të mëparshëm Kuvendin të merrte vendim për cështjen. Mandati i znj.Xhaçka u kerkua nga opozita për shkak se akuzohet per konflikt interesi në rastin kur bashkëshorti i saj Artan Gaçi ish-deputet mori statusin e investitorit strategjik.
