Deputetja e PD, Jorida Tabaku, gjatë diskutimeve për rishikimin e buxhetit në Kuvend, i ka kërkuar ministrit të Financave t’u kthehen paratë profesionistëve të lirë pasi Gjykata Kushtetuese shfuqizoi tatimin 15% që ishte vënë nga qeveria.
Nga ana tjetër ministri i Financave, Petrit Malaj tha se po presin të shprehet Gjykata Kushtetuese se çfarë do bëhet me fondet që janë mbledhur nga profesionistët e lirë. Pasi sipas tij, Gjykata Kushtetuese ka shfuqizuar pjesërisht ligjin, por s’ka interpretuar se çfarë do bëhet me paratë e mbledhura.
Ndërkohë deputetja demokrate insistoi në kërkesën e saj duke thënë se Gjykata Kushtetuese nuk është zyrë varësie e Ministrisë së Financave dhe sipas saj ajo ka dhënë vendimin dhe tashmë duhet të zbatohet.
Pjesë nga debate:
Jorida Tabaku: Pse si rimbursoni profesionistët e lirë, ca detyrimi tjetër ka qeveria veçse të zbatojë vendimet e Gjykatës Kushtetuese.
Petrit Malaj: Nuk është shprehur qartë sa i përket efektit që ka prodhuar ky ligj, të shprehet Kushtetuesja. Qeveria ka vullnetin për t’i kthyer këto fonde mbrapsht. Kemi pas një ligj që ka qenë legjitimin, Gjykata Kushtetuese përderisa thotë që ky ligj nuk është më në fuqi, të na thotë edhe efektet që ka prodhuar këtë periudhë ky ligj.
Tabaku: Ca e dini Gjykatën Kushtetuese zyrë varësie të Ministrisë së Financave, 'më interpretoni vendimin'. Ka marrë një vendim që taksa është anti-kushteuese, dje, sot dhe nesër. Ajo është në thelb antikushtetuese, kjo ka rëndësi për ju.
Petrit Malaj: Vullneti është për t’i kthyer këto fonde mbrapsht, nuk e kuptoj kush është arsyeja. Nuk po i mban shteti në xhep lekët.
Pasi gjykata rrëzoi disa nene të ligjit për tatimin e profesioneve të lira, Ministria e Ministria e Financave i është drejtuar Gjykatës Kushtetuese me kërkesë që të saktësojë se çfarë do të ndodhë me fondet e paguara nga profesionistët deri kur Kushtetuesja dha vendimin dhe çfarë do bëhet me detyrimet që kanë pjesa tjetër që nuk kanë bërë pagesat.
Janë 6541 profesionistë të lirë që kanë paguar këstet e tatimit mbi të ardhurat, me një vlerë prej 500 milionë lekësh, të cilët tashmë kërkojnë kthimin e parave.
